«Үйіміздің апатты жағдайда тұрғанынан кент, қала әкімдігі де хабардар. Бірақ әлі де жарамсыз күйде екенін дәлелдей алмай отырмыз. Үйіміздің уақыт өткен сайын артқа қарай шалқалап, құлап бара жатқанын байқап жүрміз. Жертөле суға толып, ала жаздай масаға таланып шықтық. Әкімдік тарапынан үйіміздің апатты деп танылғанын қалаймыз», – дейді Тасарық көшесі №9 үйдің тұрғыны Гүлдәрі Қабылбаева.Әупірімдеп жүріп үй алғандар ойын және спорттық алаңдардың жоғына наразы.
«Арал қаласындағы Жаңауыл шағынауданда тұрамын. Осы аймақтағы Жаңауыл мен Шанхай шағынаудандары қиылысатын тұстағы Мұхтар Әуезов көшесіне бір ойын алаңын салса деген тілегіміз бар. Халық тығыз қоныстанған бұл аймақта балалардың кешкілік мезгілде ойнайтын ойын немесе спорт алаңы жоқ. Шет аймақта орналасқандықтан, бұл жердің халқының тұрмысы назардан тыс қалып келеді. Ойын баласы кешқұрым мезгілде көше кезіп жүруге мәжбүр. Өткен жылы облыс әкімінің бастамасымен демеушілер тарапынан тұрғын үйлердің ауласына ойын алаңдары салынатынын естіп, қуанып қалған едік. Бірақ біздің аймақ тағы да ескерусіз қалып қойды», – дейді шағынаудан тұрғыны Күлбибі Махашова.Қызылорда қаласында да ойын алаңына зәру аймақтар аз емес. Әсіресе, шет аймақ тұрғындары балалар ойнайтын орынға зәру.
Ал құзырлы орын тарапынан балаларға арналған ойын алаңын салу жұмыстарының жүйелі жүргізіліп жатқанын айтады.
Қызылорда облысы әкімдігі берген мәліметке сәйкес, былтыр демеушілер есебінен ойын алаңдарын салу жұмыстары жоспарға сай жүргізіліпті. Биыл демеушілердің қолдауымен ойын алаңдарын салу жоспарға енбеген. Алайда тұрғын үймен қамту бойынша алдағы уақытта 50 көпқабатты тұрғын үйді қалпына келтіру жұмыстары жүргізілетінін мәлімдеді. Оның ішінде көпқабатты үйлердің қасбеттерін жөндеу, абаттандыру және ойын алаңдарын салу жоспарланған. Сондай-ақ 29 көпқабатты тұрғын үй салу көзделіп отырса керек. Оның ішінде 10 үй сол жағалауда бой көтереді. Байқоңырда 5, Шиелі ауданында 4 үй салынбақшы. 3 үй баспанасы апатты деп танылғандарға беріледі.
«Қала көлемінде ойын алаңдарын орналастыру жұмыстары тұрақты жүргізіледі. 2020 жылы «Жұмыспен қамтудың Жол картасы» бағдарламасы аясында 30 ойын алаңының құрылысы жүргізіліп, халық игілігіне пайдалануға берілсе, 2021 жылы бұл жұмыстар өз жалғасын тауып, 25 ойын алаңының құрылыс-монтаждау жұмыстары жүргізілді. Ойын алаңдары бірінші кезекте тұрғындардың сұранысына сәйкес қаладағы көпқабатты тұрғын үйлердің аулаларына орналастырылды. Балалар жылына орай облыс әкімі мен жеке кәсіпкерлердің қолдауымен Қызылорда қаласында бірнеше спорт және балалар ойын алаңын салу жоспарланған. Қазір қала аумағына демеушілер тарапынан межеленген спорт және балалар ойын алаңдары салынып, халық игілігіне пайдалануға берілді», – дейді Қызылорда қаласы әкімдігінің тұрғын-үй коммуналдық шаруашылығы, жолаушылар көлігі және автомобиль жолдары бөлімінің басшысы Жеңісбек Файзуллаев.Қорыта айтқанда, қандай да болмасын құрылыс жұмыстарына мердігерлердің жауапкершілігін күшейту қажеттігі байқалады. Құзырлы орындар тарапынан ауқымды жұмыстар жүргізіліп жатыр. Дегенмен оның сапасы көңіл көншітпейді.
Қызылорда облысы