Астаналықтар Шавкат Рахмоновқа ат мінгізді
Астаналықтар Шавкат Рахмоновқа ат мінгізді
Астанада жеңіліп көрмеген аралас жекпе-жек шебері Шавкат Рахмоновқа құрмет көрсетіліп, лайықты сый-сияпат жасалды. Спортшыға ат мінгізу сәтінің видеосы Instagram желісінде тарады. Видеодан байқағандай, Шавкат Рахмоновқа жұртшылық шапан жауып, ат мінгізіп, құрмет көрсетіп жатыр. Сондай-ақ, бейнежазба астында Шавкат Рахмоновқа аталған сыйды меценат, Астана қаласы бойынша ат спорты федерациясының президенті Әлібек Мұқатаевтың жасағаны айтылған.
«Өзім спортпен айналысамын және спортшыларды жақсы түсінемін. Өскелең ұрпақтың спортпен шұғылдануына және үлгі тұту мақсатында Шавкатқа жылқы сыйға тартуды ұйғардым. Әлеуметтік медианың күшін білесіз, бұны көрген жастар ойланады, түрткі болады, дем береді. Шавкат Рахмоновтан бөлек, бұған дейін боксшы Сәкен Бибосынов және басқа да спортшыларға ат мінгіздім. Спортшы жігіттерімізді үнемі қолдауға тырысамын», – дейді меценат Әлібек Мұқатаев.