Банкроттық рәсімін түсіндірді
Банкроттық рәсімін түсіндірді
402
оқылды
«AMANAT» партиясы Қы­зылорда облыстық фи­лиалының ұйымдастыруы­мен Қаржы нарығын реттеу және дамыту агенттігінің Қызылорда қаласындағы Өңірлік өкілдер басқарма­сының бастығы Ләззат Темірова «Жеке тұлғалар үшін соттан тыс банкроттық рәсімін түсіндіру» бойынша тақырыптық қабылдау өткізді. Қабылдауға сонымен қатар Қызылорда қаласында ресми филиалдары бар екінші деңгейлі банктердің өкілдері қатысты. Келушілерге сала мамандары мен банк қызметкерлері бан­кроттық рәсім алгоритмін түсін­діріп, қажетті құжаттар тізімін ұсынды. Даулы мәселелерді сотқа дейінгі тәртіппен қалай реттеуге болатынын, қайта құ­ры­лымдау дегеніміз не және ол қашан қолданылатынын, бан­кроттық рәсімдерін қолданудың қандай салдары барын ашып айтты. Президент былтыр 30 жел­тоқ­санда қол қойған «Қа­зақстан Республикасы азамат­тарының төлем қабілеттілігін қалпына келтіру және бан­крот­тығы туралы» заң 3 наурызда күшіне енген болатын. Осы заң­ның ережелері борышкерлермен қатар кредиторлардың да мүдде­лерін ескереді, осылайша екі тараптың мүдделерінің тепе-теңдігі сақталады. «Бірінші рәсім – соттан тыс банкроттық шеңберінде аза­маттар банктерге, микроқаржы ұйымдарына және коллекторлық агенттіктерге қатысты қарыз­дарын есептен шығару жөнінде өтініш бере алады. Мұндай рә­сімді қолында мүлкі жоқ адамдар пайдалана алатыны және олар­дың жиынтық кредиттік мін­деттемелері 1 600 АЕК-тен аспау керектігі жөнінде айта кеткен жөн, бүгінде ол 5 520 000 тең­ге­ні құрайды. Сондай-ақ мін­детті талап – қатарынан 12 ай өз міндеттемелерін өтемеу болып табылады. Екінші рәсім – сот бан­кроттығы. Бұған 1 600 АЕК шекті мәннен асатын сомаға мін­деттемелері бар барлық бо­рыш­керлер кіреді. Бұл өлшемге сәйкес келетін азаматтар тіркел­ген жері бойынша сотқа бан­кроттыққа өтініш бере алады. Үшінші рәсім, «төлем қабі­леттілігін қалпына келтіру» деп аталады және одан өткен бо­рыш­кер банкрот деп таныл­майды. Бұл ретте мұндай рәсімді жиынтық міндеттемелері олар­дың мүліктерінің құнының мөл­шерінен аспайтын азаматтар пайдалана алады», – деді Ләззат Болатқызы. Маманның айтуынша, бан­кроттық рәсімі қолданылғаннан кейін ол адам бес жыл бойы банк­тен несие де, қаржы ұйым­дарынан микрокредит те ала алмайды, тіпті кепілгер немесе қоса қарыз алушы да бола алмайды. «Банкрот» мәртебесі бар адам автокөлікке немесе ипотекаға кредит берудің мем­лекеттік жеңілдікті бағдарлама­ларына қатыса алмайды. Кре­диттік ұйымдардың ішкі саясат­тарына сәйкес, 5 жыл өткеннен кейін де кредиторлар бұл адам­дарды басты назарда ұстауы әбден мүмкін. Сонымен қатар «банкрот» мәртебесі бар адамдар жеті жыл ішінде бұл рәсімге қайта өтініш бере алмайды. Ләззат Темірова келушілерге толық ақпарат ұсынып, қосым­ша мәлімет қажет болса өңірлік басқармаға жүгінуге болатынын немесе https://www.fingramota.kz/kk сайтынан білуге болаты­нын жеткізді.