«Генерал Солтүстік Кипрде жүр» деген ақпарат тарады. Заңгерлердің айтуынша, Солтүстік Кипр мен Қазақстан арасында күдіктілерді экстрадициялау туралы келісім жоқ. Заңгер Бағдат Амандосұлы: «Қазақстанға Израиль, Біріккен Араб Әмірліктері, Ұлыбритания, Косово және Солтүстік Кипр күдіктілерді ұстап бермейді. Себебі, бұл мемлекеттермен екі жақты келісімшарттар жоқ. Олар бізге қылмыскерді ұстап беруге міндетті емес», – дейді. Сонымен қатар үй қамақта жүрген Күдебаевты көзден таса қылмай қадағалауы тиіс қызметкерлерге де заң бойынша 7 жылға дейін жаза қарастырылған. Күні кеше сот генералдың 23 наурызда Қырғызстан арқылы Түркияға өтіп кеткенін растаған болатын. Ұлттық қауіпсіздік комитеті оның шекарадағы бақылау-өткізу пунктінің ешбірінен өтпегенін хабарлады. Қазір қашқын генералды іздеумен Сыбайлас жемқорлыққа қарсы іс-қимыл агенттігі мен прокуратура айналысып жатыр. Алматы облысы Полиция департаментінің бұрынғы бастығына Қаңтар оқиғасы кезінде «қызметін асыра пайдаланды» деген айып тағылған. Прокурор оны 9 жылға бас бостандығынан айыруды сұрағаннан кейін Күдебаев денсаулығының нашарлығын сылтау етіп, сот отырысына бармады.
Генерал Серік Күдебаев үкім шықпас бұрын, елден қашып кетті. Айыпталушы Серік Күдебаев ұсталған жағдайда, негізгі жазасынан бөлек, тағы 3 жылға бас бостандығынан айырылуы мүмкін. Бұл туралы Aikyn.kz КТК арнасына сілтеме жасап хабарлайды.
