Атырау облысының қолайсыз экологиялық ахуалы туралы аз айтылып жүрген жоқ. Десек те, соңғы күндердегі қамыс өртіне байланысты облыс орталығының қою түтінге көміліп, тұрғындардың денсаулығына қауіп тудырғаны алаңдаушылық туғызып отыр.
Осынау маңызды мәселеге орай бүгін «AMANAT» партиясының облыстық филиалы алаңына арнайы жиын өтті. Депутаттармен қатар, жауапты құрылым өкілдері қатысқан партия жанындағы экология жөніндегі өңірлік қоғамдық кеңестің отырысында тараптардың айтары тыңдалып, пікірлер ортаға салынды.
Каспий теңізі жағалауындағы Ақжайық резерваты территориясында қамыс өртену мәселесі көтерілгенімен, проблеманың нақты шешімі табылған жоқ. «Баяғы жартас, бір жартас» күйінде қалып келеді. Халықтың талабын естіп, үніне құлақ асатын құрылым қажет екенін атаған жиын қатысушыларының: «Қамыс өртінің алдын-алу шаралары неліктен қолға алынбайды? Өрттің соңғы уақыттарда тіптен жиілеп кетуінің себебі неде? Тілсіз жаумен күресетін арнайы техника неге алынбайды? Теңіз жағалауындағы бірнеше гектар жерді шарпитын өртті ауыздықтауға мұнайлы өлке неге қауқарсыз?» деген сауалдарына нақты жауап берілмеді.
Кеңес отырысында төтенше жағдайлар департаментінің материалдық-техникалық базасын нығайту, аймақта өндіріс ошақтары көптеп орналасқандықтан олардан шығатын зиянды қалдықтардың ауаға таралмауына тосқауыл болу, экологиялық мониторинг жүргізу мәселелері көтерілді. Жиында депутаттар бұл бағытта жұмыстанатындарын жеткізіп, мәселенің партия назарынан тыс қалмайтынын атады.
