Заманбек Нұрқаділовтың бірінші жары Нұрбике Нұрқаділова «Уақыт көрсетеді» бағдарламасына алғаш рет сұхбат беріп, марқұм қайраткермен отасқан күндерін еске алды, – деп хабарлайды Caravan.kz.
Оның айтуынша, олар үйленетін кезде, саясаткердің қалыңмал беруге ақшасы да болмаған.
"Бізде махаббат пен кедейлік болды. Екеуміз де студентпіз ғой. Қалыңмалға әкелетін ақшасы да болмаған. Ол кезде ақша қайдан болсын. "Қалыңмал бермесең, өзенге лақтырып жібереді" десем: "Мен жүзуді де білмеймін ғой" дейтін. Анасы мен әпкесі, нағашылары болды қасында. Кішкентай баламызбен жалдамалы пәтерде тұрдық. Қазіргі жастар есеппен үйленеді ғой. Ал бізде махаббат пен кедейлік болды", – дейді ол.
Сонымен бірге ол «Зәкеңмен» 27 жыл бірге тұрғандарын атап өтті.
«27 жыл бірге тұрдық, сосын анау-мынау болып кетті өмірі Зәкеңнің. Үйден кетпекші болып, сол 30 жыл дегенде ажырастық. 1965 жылы үйленіп, 1995 жылы ажырастық. Тек жолы болсын. Бізден кетті, басқаға жетті. "Аман жүр, балалар үшін аман жүр", – дедім. Солай деп жібердім. Әкімдікке жетті. Бірден әкім болған жоқ. Құрылыста мастер болып бастады. Содан көтерілді. «Балалар ересек, араласып тұрарсың» деп жіберген едік қой», – деп еске алды Нұрбике Нұрқаділова.
