Танымал медицина профессоры Алмаз Шарман коронавирус инфекциясын жұқтырып алмауға қатысты ақыл-кеңесін айтты.
«Коронавирус инфекциясының таралуы пандемияға тән сипатқа ие болып бара жатқан секілді. Қазірдің өзінде тиісті қорғаныс шараларын қабылдау керек. Ең алдымен айғай-сүрең мен жалған ақпарларға сенбеуге шақырар едім. Шынайы ақпаратқа сүйеніп, инфекцияның қандай жолмен тарайтынын анықтап алған абзал. Коронавирус жұқтырған адаммен жақын қарым-қатынаста болған жағдайда жөтел немесе түшкіру кезінде, яғни ауа арқылы құрамында вирусы бар сілекей арқылы жұғады. Бұл тамшылар кісінің жанында тұрған адамға жетіп, қасындағы адам оны жұтып қоюы мүмкін» деп жазды Алмаз Шарман Facebook парақшасында.
Оның пікірінше, вирусы бар адамнан 2 метр ғана қашықтықта тұрған кісі 10 минуттың ішінде коронавирус инфекциясын жұқтыруы мүмкін.
«Сонымен бірге вирусты тамшылар әртүрлі заттардың бетіне де, мәселен автобустың орындығына, кітап пен клавиатураға, тінтуірге шашырауы ықтимал. Сол үшін әрдайым қолыңызды таза сумен жуып отырған жөн. Алақанды ысқылай жуып, буынның сыртқы бөлігінде, саусақтар мен тырнақ ішін де тазалап отыру керек. Қолды шамамен 20 секундтан артық жуу керек. Жөтелген немесе түшкірген кезде мұрныңыз бен аузыңызды мейлінше салфеткамен жабуға тырысыңыз. Қолданылған салфетканы бірден лақтырып отыру керек. Егер қасыңызда салфетка болмаса, аузыңызды алақаныңызбен емес, шынтақпен жабуға тырысыңыз», – дейді профессор.
Айтпақшы, қарапайым медициналық маскалар жеткілікті дәрежеде қорғай алмайды екен.
«Алайда маскалар кішкентай аэрозольды бөліктерден сақтай алмайды. Сонымен қатар маска көзді де қорғай алмайды. Көз арқылы да вирус ағзаға еніп кетуі ықтимал. Басқаша айтқанда, маскалар коронавирус инфекциясынан жеткілікті дәрежеде қорғай алмайды», – дейді Алмаз Шарман.
Айдар ДӘУІТҰЛЫ
