Қоқыстан қашан құтылады?

Қарағандыда қалдықтар мәселесі бұрыннан өзекті болатын. Не сани­тар­­лық, не экологиялық нормаға сай келмейтін қоқыс орындары тұрғын­дар үшін үйреншікті жағдайға айна­лып кет­кендей. Облыс орта­лығын­дағы жағ­дай да осы. Рас, Экология департа­ментінде атап өткендей, ғарыштық мониторинг оң нәтиже беріп, уәкілетті органдарға жабайы қоқыс полигон­дарын анықтауға оңайырақ болды, дегенмен мәселе түбегейлі шешілмей отыр. Әйтсе де, Қарағанды облысы Экология депар­таменті өңірде жыл са­нап рұқсат етіл­меген қоқыс үйін­ділері азайып келе жатқанын айтады. Мәселен, 2020 жылы Қарағанды қала­сында 382 рұқ­сат етілмеген полигон анық­тал­ған. 2021 жылы бұл көрсеткіш 350-ге, 2022 жылы 162-ге дейін азайған. 

– Былтыр ауданда 25-ке жуық по­ли­гон жойылды. Биыл да бұл жұ­мыс­тар жалғасады. Полигондарды жою жұ­мыс­тарын экологтармен бірге жүргі­земіз. Олар бізге қоқыс үйіліп қалған аумақтарды көрсетеді. Сон­дай-ақ әкімдік мамандары полигон­дарды анықтау үшін айналма жол жүргізеді. Біз Полиция департаменті­мен бірлесіп жұмыс жүргіземіз. Бірақ аудан тұрғын­дары қоқысты рұқсат етілмеген жерге тастаудан тыйылмай тұр. Аудан тұрғындарынан көптеген шағым келіп түсіп жатыр. Қалаған же­рі­не қоқыс тастайтындарды жаза­ла­май, іс өнбей-ді, – дейді Әлихан Бөкей­хан атындағы аудан әкімдігінің абаттандыру және жедел басқару бөлімінің басшысы Сәбит Жанса­ғымов. 

Сондай-ақ абаттандыру және же­дел басқару бөлімінің басшысы кейбір жеке сектордағылар үйлерінің жанына қоқыс жәшіктерін орнатудан бас тартатынын айтады. Осыдан кейін-ақ олардың қоқысты қайда шыға­ра­тынын түсіне беруге болатын­дай. 

Сәуір айының басында Қарағанды облысының Экология департаменті мен Жергілікті полиция қызметкер­лері арнайы рейд жүргізді. Рейд кезінде құзырлы орган қызметкерлері 20-дан астам ауыр жүк көлігімен қоқыс төккен азаматтың заңсыз әрекетінің үстінен түсті. Экология департаменті қолға түскен азаматты заң аясында жауапкершілікке тарт­пақ. Негізі, рұқсат етілмеген жерге заңсыз қоқыс төккендер «Әкiмшiлiк құқықбұзу­шылық туралы» кодекстің 344-бабына сай жазаланады. Атап айтқанда, жеке тұлғаларға 50, заңды тұлғалар 100 ай­лық есептік көрсеткіш мөлшерінде айыппұл салынады. 

Өткен 2022 жыл Қарағанды об­лы­сында 745 рұқсат етілмеген қоқыс по­ли­гоны анықталды. Олардың 725-і жойылған еді. Сонда да көрінген жерге қоқыс тастайтындардың әрекетіне тоқтам болмай тұр. Оның соңы қалай аяқталатыны белгілі. 

Әдебиет БЕЛГІБАЙҰЛЫ,

Қарағанды облысы