Олар күн сайын түрлі кедергілерге тап болады. Сол үшін де еліміз кедергісіз аймаққа айналуы тиіс.
Бүгінде Ақмола облысында 29 мыңға жуық мүмкіндігі шектеулі азамат тұрып жатыр. Жасыратыны жоқ, мүгедек жандардың медицина қызметі мен қажетті гигиеналық заттардың сапасына наразылығы басылар емес.
Ақмола облысында қиын жағдайдағы отбасылар мен мүгедектерді медициналық қамтамасыз ету және қызмет көрсету бойынша атқарылып жатқан жұмыстары партия алаңында тыңдалды. Денсаулық сақтау басқармасы мен Ақмола облысының жұмыспен қамтуды үйлестіру және әлеуметтік бағдарламалар басқармасының өкілдері осы бағыттағы кеңес мүшелерінің алдында есеп беріп, бірқатар ұсыныстарын қабылдады.
Ақмола облыстық мәслихатының депутаты, «Шанс» мүгедектерді оңалту орталығының жетекшісі Василий Шиманский мүгедектерді гигиеналық құралдармен, медициналық бұйымдармен қамтамасыз ету, хирургтарды әрі қарай аяқ-қолдарды протездеу үшін білімін жетілдіру, операциядан кейінгі адамдарды емдеу мекемесінен мейірбикелік бөлімшелерге ауыстыру, онда пациенттерге операциядан кейінгі кезеңде тиісті көмек көрсету мәселелерін көтерді.
Василий Шиманскийдің айтуынша, мемлекеттік портал арқылы сатып алынатын тауарлардың сапасы сын көтермейді. Көп жағдайда құны арзан, сапасы төмен арбалар, аяқкиімдер мен гигиеналық заттар келіп түседі. «Өзге мемлекеттегі тәжірибелерді өзімізге алуымыз керек. Мүгедек жандар үшін мемлекеттік порталмен сатып алынған бұйымдар біздің наразылығымызды тудырады. Ол үшін министрлік деңгейінде және «Кедергісіз келешек» партиялық жобасы аясында әлеуметтік карталарды іске қосу қажет», – деп наразылығын білдірді І топ мүгедектігі бар Василий Шиманский.
Жалпы, мүгедектерді гигиеналық құралдармен қамтамасыз ету халықты әлеуметтік қорғау органдарының қаражаты есебінен жүзеге асырылады.
Өңірде 2022 жылы 385 млн теңге соммасына 4 398 адам гигиеналық құралдармен қамтылған. Ал биылғы жылдың алғашқы тоқсанында 102 млн теңге соммасына 1 001 адам міндетті гигиеналық құралдармен қамтамасыз етілген. Биылғы 1 шілдеден бастап, жергілікті бюджет есебінен мүгедектерге берілетін гигиеналық жөргектердің стандартын екі есе арттыру жоспарлануда.
Мүгедек балаларды үйде оқыту үшін 329 мүгедек балаға 8,8 млн теңге өтемақы тағайындалды, 214 балаға 6,1 млн теңге төленді. Жиынға қатысқан мүгедек бала тәрбиелеп отырған ата-аналар, тиісті басқарма тарапынан берілген аяқкиімдердің сапасына наразылығын білдіріп, кейбір анализдерді Астана қаласына барып тапсыруға мәжбүр екендігін жеткізді.
Ал протезді орнатуға қатысты, облыстық денсаулық басқармасының өкілі өңірдегі хирургтер аяқ-қолдарды протездеу ісін жалпы терапия бағдарламасы аясында өткеннен кейін, одан әрі білімін жұмыс орнында шыңдайтынын айтты. Бұл үшін арнайы курстар немесе бағдарламалар қарас тырылмаған. Кеңес мүшелері облыстық хирургтер қоғамдастығы арқылы мәселені тағы бір көтеріп, шешімін табуға уағдаласты.
Кеңес мүшелері жиын соңында Мемлекет басшысы Қасым-Жомарт Тоқаев халыққа арнаған Жолдауында «Мемлекеттің ерекше қажеттілігі бар адамдарға көпшілікпен бірдей жағдай жасауға міндетті» деген сөзін екере отырып, бірқатар ұсыныстар қабылдап, тиісті органдарға жолдады.