Қаланы жалпы тазалау кезінде бес ауданның әрқайсысына ағаштар мен бұталар егілді. Оның барысында жапырақты ағаштарға басымдық беріліп, барлығы сегіз мыңға жуық жасыл желек отырғызылды.
Алматы ауданы әкімінің орынбасары Мұхамедияр Қожекеновтің айтуынша, сенбілікке қатысқан әкімдік қызметкерлері мен қоғамдық ұйымдар, ардагерлер мен белсенді тұрғындар Президент саябағына 300-ден астам жасыл желек отырғызыпты.
– Біздің ауданымыздағы басқа да саябақтарда, мектеп пен балақбашқа аумағында, ауданның тұрғын үй аулаларында да көшет егіліп, қоқыс жинау жүргізіліп жатыр. Жалпы, көктемдік айлық аясында 2 жарым мыңнан астам жасыл желек отырғызылмақ. Ал 2023 жылы ауданымызда 10 мыңнан аса жасыл желек егіледі. Экологиялық айлық аясында ауданымызда сенбіліктер үнемі өткізіліп тұрады. Біз қала тұрғындарын сенбіліктерге белсенді қатысуға шақырамыз. Ал өз тарапымыздан қажетті құрал-жабдықтармен қамтамасыз етеміз. Ең бастысы, жақсы көңіл күймен келіп, ауданды көгалдандыруға үлес қосуы керек, – деді Алматы ауданы әкімінің орынбасары Мұхамедияр Қожекенов.
Сенбілік барысында Президенттік саябақта ағаш отырғызуға түрлі ұйымдар мен кәсіпорындардың өкілдері қатысты, олардың арасында дипломатиялық корпус, Қаржы министрлігінің Қазынашылық комитеті, «Қазақстандық стандарттау және метрология институты» РМК, Қоғамдық кеңес, Qazaq Air АҚ, Ардагерлер кеңесі бар.
– Бәріміз Астананың жасыл желекті қала болғанын қалаймыз. Осыған атсалысып, ағаш отырғызғаныма қуанамын. Өзім саябаққа қарама-қарсы тұрамын, – дейді іс-шарадан алған әсерімен бөліскен Ұлыбританияның Қазақстандағы елшісі Кэти Лич.
Сенбілікке қатысқан Астана қаласы Қоғамдық кеңесінің төрағасы Зулфухар Гаиповтің сөзінше, мұндай шараның тұрақты өтіп тұрғаны маңызды.
– Көктем шыға, күн жылына ауылдың іргесін тазалап, қоршаған ортаға қан жүгірту – қазақ халқының бұрыннан келе жатқан дәстүрі. Бүгінгі сенбілік соның бір жалғасы және мұндай шараға тұрақты қатысуды әркім өзінен бастағаны жөн. Біз үнемі «әркім өзінен бастау керек» дегенді жиі айтамыз. Сондықтан қоғамдық жұмысқа атсалысып, бір тал ағаш отырғызуға септігін тигізсе, қоршаған ортаға пайдасын келтіру деген осы. Бұл –экологиялық тәрбие ғана емес, болашақ ұрпақты еңбекке баулу. Көріп отырсаңыздар, бүгін дипломатиялық корпус өкілдері кішкентай балаларымен келіп ағаш отырғызып жатыр. Оның тәрбиелік мағынасы көп. Өйткені өскенде өздері де үлкендердің істеп жатқан еңбегін қайталайды. Бұл да Президентіміз айтып жүрген еңбек адамын қалыптастыруға септігін тигізері сөзсіз. Ал жалпықалалық сенбілік – қала келбетін ажарландыруға қосқан қоғамдық борышымыз, – дейді Зулфухар Гаипов.
Қалалық әкімдік қызметкері Қымбат Қасымова – қоғамдық жұмысқа баласын өзімен бірге ерте келгендердің бірі. «Бала айтқаныңды емес, көргенін істейді» деген ол: «Ересектердің не істейтінін көрсін, білсін деп алып келдім. Бірін-бірі танымаса да, біріне-бірі жылылық танытып, бірлесе жұмыс істеген жұртты көруінің өзі үлкен өнеге деп білемін. Соған қызығып, өзі де сенбілікке араласып кетті. Бұл – алдымен ұрпақ тәрбиесі. Бізден көргенін, келешекте өздері істейді. Екіншіден, баланы тазалыққа, еңбекқорлыққа үйретеді. Осындай шараны ұйымдастырған қала әкімдігіне алғысым шексіз. Біз баламызды өз үйіміздің ауласында өтетін іс-шараларға да қатыстырып, үнемі өзімізбен бірге ертіп жүреміз», – дейді.
Осылайша, «Жасыл Астана» эко-айлығы аясында өткен алғашқы жалпықалалық сенбілікте бес ауданда 8 мыңға жуық жасыл желек отырғызылып, қала аумағынан мың тоннадан астам қоқыс жиналды. Сенбіліктер сериясы алдағы уақытта да жалғасын таппақ. Сондай-ақ 2027 жылға қарай 85 учаскеде саябақтар мен тынымбақтар салу, «Жасыл белдеуде» 650 мың ағаш отырғызу, 2,4 мыңнан астам қоқыс контейнерін орнату, коммуналдық көлікті газға көшіру, жыл сайын 200-ден астам аула мен қоғамдық орынды абаттандыру көзделіпті.
Жадыра МҮСІЛІМ