Ондай адамдармен сөзің жарасып, туысқандай табысып кету еш қиындық тудырмайды. Тіпті, ішкі жан дүниең кеңіп, бүтін болмысың байып қалады. Осындай емен-жарқын ашықтық 80-жылдары ҚазҰУ-де оқыған жастардың біразына тән еді. Ал тарих факультетіне оқуға түскен жігіттердің табиғаты, бітім-болмысы басқалардан өзгешелеу болатын. Олардың басым көпшілігі бұл күндері бәрімізге белгілі, белді азаматтар. Солардың бірі һәм бірегейі бүгінгі кейіпкеріміз Талғат Құмарғалиұлы десек, артық айтқандық емес. Алып тұлғасымен, жайсаң мінезімен, іскерлік қасиеттерімен басқалардан оқшау тұратын студент Талғат университет басшыларының назарына ерте ілікті.
Әл-Фараби атындағы Қазақ ұлттық университетін бітірген соң сол оқу орнындағы «Қазақстанның жаңа және қазіргі заман тарихы» кафедрасына қызметке орналасып, ғылымға ден қойған Талғат Мекебаев өзіне де, өзгелерге де беймәлім «Қазақстандағы уақытша Үкімет органдарының қызметі» атты жұмбағы көп тақырыптың тереңіне қойды да кетті. Сан түрлі зерттеудің сырына үңіліп, тың деректер іздеді.
Тәкең мол материал жинай жүріп, шаруасын шырқ үйірді. Үзбей жазып, уақытша Үкімет тұсындағы қым-қуыт оқиғаларға өзінше баға берді. Оқырман қауым оның ғылыми мақалаларын көзінен таса етпей, жанына жақын тұтты.
Кеңес Одағында қалыптасқан идеологиялық себептердің салдарынан ұмыт бола бастаған тарихи жырларды жинап, жариялаудағы нәтижелі еңбектері Талғат Мекебаевтың азаматтық абыройын тағы да аспандата түсті.
Егер ер жігіттің сегіз қырлы, бір сырлы боларын бағамдап, бағалай алсақ, Тәкеңнің бойынан бұл болмыстың да бірнеше қырын көрер едік. Ол университет қабырғасында дәріс оқып жүріп, басшылық қызметтерді абыроймен атқарды. 2011 жылдан әл-Фараби атындағы ҚазҰУ қызметкерлерінің «Парасат» кәсіподағы төрағасы қызметін атқарып жүр.
Біле-білгенге университет кәсіподағының шаруасы да шаш етектен. Алайда Талғаттың болмысы қызметі өсіп, абыройы арта бастаған тұста да өзгере қойған жоқ. Университет қызметкерлерінің «Парасат» кәсіподағының екі тізгін, бір шылбырын ұстаған шақта да Талғат ұлан-ғайыр іс тындырды. Университет қызметкерлері мен 118 оқытушысы мекеме басшысының көмегімен, соның ішінде Талғат Мекебаевтың жеке араласуымен жеңілдетілген бағамен бірнеше пәтерге ие болды. Айта берсек, университетте атқарылып жатқан мұндай келелі істер жетерлік. Бұл Тәкеңнің нағыз іскерлік, ұйымдастырушылық қабілет, қырларын ашты.
Талғат Құмарғалиұлының ел игілігі үшін атқарған еңбектері елеусіз қалған жоқ: «Шапағат», «Ы.Алтынсарин», «Ерен еңбегі үшін» және әртүрлі дәрежедегі орден-медальмен марапатталды; «Білім беру ісінің құрметті қызметкері», «Мәдениет саласының үздігі», «Жоғары оқу орнының үздік оқытушысы» деген құрметті атақтарға ие болды. Мұның бәрі бүгінде алпыстың асуына шығып отырған Талғат Мекебаевтың өмір жолының өнегелі, ел үшін атқарған қызметінің қайырлы екенін көрсетеді.
Пазылбек ҚУАНБАЙҰЛЫ