Бұл жобаны Animal Security қоғамдық қоры Алматы қаласы Кәсіпкерлік және инвестициялар басқармасымен бірлесіп әзірлепті. Қазір қалада 20 үйшік бар. Жыл соңына дейін тағы 50 үйшік салынады. Қараусыз қалған мысықтарға арнап дайындалған үйшіктер қаланың Медеу, Алмалы аудандарында орнатылған. Үйшіктерді мекендейтін мысықтарға вакцина салынған. Яғни, тұрғындар үшін қауіпсіз. Ал үйшіктердің тазалығы мен қауіпсіздігіне кім жауапты? Осы жөнінде Animal Security қоғамдық қорының басшысы Наталья Сульжиктен сұрап білдік:
– Жобаның негізгі мақсаты – жануарларға көңіл бөлуді, адамгершілікпен қарауды насихаттау. Жақында қаңғыбас мысықтарға арналған үйшіктер Бостандық, Әуезов аудандарында да орнатылады. Үйшіктер дайын тұр, тек әкімдіктің рұқсат беруін күтіп отырмыз. Ағаш күркелердің тазалығына арнайы бекітілген мамандар жауап береді. Олар аулада залалсыздандыру жұмыстарының жүргізілгені жайлы есеп беріп отырады. Біз тұрғындардың өтініш беруі арқылы жұмыс істейміз. Кураторлардың өтінішінсіз үйшіктерді орната алмаймыз. Үйшік мысықтарды күтетін кураторлар болған кезде ғана беріледі. Алдағы уақытта қаңғыбас иттерге арналған тәлімбақтар да орнатамыз, – дейді ол.
Мегаполистегі иесіз қалған жануарларға үйшіктер орнату мәселесі пилоттық жоба негізінде биыл наурыз айында басталған еді. Жануарларды қорғау қорларына жалпы саны 500-ден астам өтінім келіп түскен. Аталмыш жоба қала тұрғындарының оң пікіріне ие болып үлгерген. Әлеуметтік желі қолданушылары арасында бастаманы қолдап, үй жануарларына мейіріммен қарау қажет екенін алға тартқан оқырман саны басым.
«Өркениетті елдерде мұндай күтім бұрыннан бар. Уақыт өте келе бұл адамдар мен жануарлардың өзара бірлікте өмір сүруіне алып келеді. Балалар сүйіспеншілік пен махаббаттың, қамқорлықтың не екенін біліп өседі. Осындай құндылықтар біздің әлемге жетіспейді», – дейді алматылық Мисюрина Светлана
Еске салайық, биылғы сәуір айында Алматы қаласындағы қараусыз қалған жануарлардың санын ізгілікті түрде реттеудің 2021-2024 жылдарға арналған бағдарламасы негізінде қала әкімдігі үй жануарларын тегін чиптеу бағдарламасын қайта іске қосқан болатын.
Алтынай БАУЫРЖАНҚЫЗЫ,
Алматы қаласы