Осы мерзім ішінде аймақ басшысы түрлі сала өкілдерімен кездесіп, өзіне таңсық емес қызметтің қыр-сырын барлап шықты. Дұрыс-ақ. Себебі Ербол Шырақпайұлы бұған дейін ауыл шаруашылығы сияқты бір ғана саланың тізгінін ұстап, «болыс» деген қызметтің барысын білмеген еді. Содан болар, Әулиеатаның жаңа әкіміне барлығын көзбен көріп, тіпті Тараз қаласының округтерін таңсәріден жаяу аралап шығуына тура келді. Міне, сондай дауы басылмайтын, мәселесі таусылмайтын алқаптың бірі – «Ұлы дала» ықшамауданы.
Аталған аудан Ербол Қарашөкеевтің есінде ерекше қалғаны анық. Себебі аймақ басшысы қызметіне тағайындалған күннің ертесіне ықшамаудан тұрғындары әкімдікті басып кіріп, 10 мыңнан аса оқушының тегін тамақ пен оқу жылы қарсаңында берілетін 40 мың теңгеден қағылып отырғанын жеткізген. Ата-аналар ауданда мемлекеттік мектеп болмағаннан кейін балаларын жекеменшік білім орнына беруге мәжбүр болып отырғанын ашына айтқан. Сол себепті мұндағы оқушылар мемлекет тарапынан берілетін тегін тамақ пен қаржылай көмектен қағылған.
Шу шығарған тұрғындардың алдына Ербол Қарашөкеев шығып, сол кезде мәселені жылы жапқандай болды. Шағымданушыларға уәде еткендей «Ұлы дала» ықшамауданын аралап шығып, жауаптыларға нақты тапсырмасын берді. Алайда сол уақыттан бері айдан аса уақыт өтсе де, «баяғы жартас, бір жартас» күйі қалуда. Мәселенің мәнісін білмекке облыстық Білім басқармасына хабарластық.
«Тараз қаласындағы №15 ықшамауданында биылғы жылдың қараша айында 1 200 орындық мектеп ашу жоспарланған.
Жекеменшік мектептер Оқу-ағарту министрлігінің Қаржы орталығы арқылы қаржыландырылады. Бөлінген қаржыны реттеу және бақылау – республикалық қаржы орталығының құзырында. Облыстағы жекеменшік мектептер жан басына шаққандағы қаржыландыру шеңберінде жұмыс істейді. Жекеменшік мектептер мемлекеттік-жекеменшік әріптестік есебінен емес, жеке кәсіпкерлердің өз қаражаты есебінен ашылып, жұмыс жасауда», – деген басқармадан ресми жауап алдық.
Жалпы мемлекеттік мекемелердің мұндай жаңылтпаш жауабына етіміз үйренген. Бір білгеніміз – қараша айында 1 200 орындық мектептің құрылысы аяқталғанда балаларды тегін тамақтандыру мәселесі шешілетін көрінеді. Ал 40 мың теңге көлеміндегі қолдау қаржысына қатысты біржақты шешім жоқ.
Негізі, жекеменшік мектептердегі оқушыларды тегін тамақтандыру мәселесі жуырда Үкімет деңгейінде көтерілген болатын. Сондай-ақ түйткілдің түйінін тарқату Мәжіліс мінберінде қаралатыны айтылған. Егер халық қалаулыларының ұсынысы қолдау тапса, жаңа заңға өзгерістер еніп қалуы бек мүмкін. Бірақ бұл да нақты шешілген дүние емес. Сондықтан әзірге жекеменшік мектептерде оқып жатқан балаларға өгейдің күнін кеше тұруына тура келеді.
Биыл Жамбылда мектеп құрылысына қатысты «бауын тапса да, байлауын таппаған» тірлік көп. Тіпті, құрылыс жұмыстары жүріп жатқан №44 мектепте жарылыс болып, алты жұмысшы түрлі дене жарақатын алған. Ал екі бойжеткен өрттен қашамын деп үшінші қабаттан секіріп кетіп, аурухананың жансақтау бөлімінен бір-ақ шықты.
«Ғимараттың 3-қабатында құрылыс жұмыстары жүріп жатқан. Бояу мен еріткіш қосындысын араластырған сәтте өрт шыққан. Оқиға орнына жедел жеткен өрт сөндірушілер өртті толығымен сөндірді», – деген ақпарат берді сол кезде облыс әкімдігінің баспасөз қызметі.
Өрт салдарынан 6 жұмысшы жарақат алса, оның төртеуі әйел, екеуі ер адам. Бұған дейін терезеден секіріп кеткен 2001 және 2002 жылы туған қыздардың жағдайы ауыр екені айтылған еді. Сол себепті облыстық Денсаулық сақтау басқармасына хабарласып, науқастардың қазіргі халін білдік.
«Сол кезде зардап шеккендер Тараз қалалық көпбейінді ауруханасына жеткізілді. Сол күні-ақ екі адам үйіне қайтарылды. Ал екі адам жансақтау бөліміне жатқызылды. Жағдайлары ауыр болатын. Бірақ дәрігерлердің дер кезінде көрсеткен көмегінен кейін барлығының жағдайы түзелді. Қазіргі таңда үйлеріне шығарылды», – дейді облыстық денсаулық сақтау басқармасының баспасөз қызметі.
Оқиғаға қатысты Қылмыстық кодекстің 292-бабы 1 бөлігі «Өрт қауiпсiздiгi талаптарын бұзу» бойынша қылмыстық іс қозғалып, тиісті сараптама жүргізілді. Сондай-ақ түн мезгілінде құрылыс жұмыстарын жүргізуге рұқсат берген жауапты адамдар тергелуде. Ал Тараз қаласының әкімі Бақытжан Орынбеков зардап шеккен азаматтардың ата-аналарымен кездесіп, барлық медициналық, әлеуметтік көмек көрсетілетінін, жалақылары толық төленетінін және барлық шығынды мердігер «Азамат құрылыс» ЖШС өз мойнына алатынын айтты.
Әрине, зардап шеккендерге тиісті көмек көрсетілгені дұрыс. Алайда «Ұлы дала» ықшамауданында да, №44 мектептегі оқыс оқиға да мердігердің құрылысты дер кезінде аяқтамағанынан туындап отыр. Сондықтан тендер төңірегіндегі мұндай мәселеге тиісті министрлік көңіл бөліп, оқу орындарының құрылыстарын сенімді мердігерлерге ғана жүктейтін жүйесін жасаса деген тілегіміз бар. Себебі Үкімет үйінде қабылданған шешімдердің артында балалар тағдыры мен адам өмірі тұр.
Саятхан Сатылған,Жамбыл облысы