Мұны БҰҰ аясында Ташкентте өтіп жатқан аймақтық конференцияда Сыбайлас жемқорлыққа қарсы іс-қимыл агенттігі бірінші қызмет басшысының орынбасары Жігер Байділдин айтты.
«Қоғамдық бақылауды күшейту үшін жемқорлар тізімін жариялау сияқты заңнамалық нормалар пысықталып жатыр. Егер лауазымды тұлға немесе шенеунікке қатысты сот үкімі шығатын болса, онда оны уәкілетті орган реестрге енгізеді. Бұл сайтта жария болады. Кез келген азамат онлайн түрде сол сайтқа кіріп, қандай лауазымды тұлға қаншаға, қандай бап бойынша сотталды деген сияқты деректерді көре алады», – деп түсіндірді Ж.Байділдин.
Ол атап өткендей, парақорлар тізімін жариялау бойынша әуелі заңнамалық актілерді қабылдау қажет. Агенттік дерегінше, бекітілуі мүмкін ереже ешкімнің заңды құқығын шектемеуі және Конституцияның талаптарына қайшы болмауы тиіс.
Ведомствоның ресми өкілі Арман Тілеукеновтің айтуынша, бұл жүйе жұмыс берушілер үшін тиімді болмақ. Нақты тоқталсақ, қандай да бір кандидатты қызметке алмас бұрын басшы сол сайтқа кіріп, ол үміткердің жемқорлық жасаған-жасамағанын біле алады.
Сот үкіміне сай жазасын өтеп, мемлекеттік қызметте жұмыс істеуіне салынған тыйым уақытын өткергеннен кейін реестрде тұрған азаматтардың деректері тізімнен алынып тасталуы мүмкін. Сыбайлас жемқорлыққа қарсы қызмет агенттігі әзірге бұл талаптарды пысықтап жатыр.
Фото: arbatmedia.kz