26 қазанда Топар ауылында сібір жарасының ошағы анықталған-ды. Инфекция көзі жеке шаруа қожалығының бұқасы екені анықталып, оның өлексесі жойылды.
Ауру жұқтырған бір тұрғын жұқпалы аурулар орталығында көз жұмды.
«Дәрігерлер қабылдаған барлық шараға қарамастан, сібір жарасын жұқтырғаннан кейін жансақтау бөлімінде жатқан 1948 жылы туған науқас қайтыс болды. Өлім күйдіргінің ауыр кезеңіне және қатар жүретін аурулардың болуына байланысты болды», – деді облыстық Денсаулық сақтау департаментінің баспасөз қызметі.
Сонымен қатар департаменттегілер түсіндіргендей, медициналық көмекке кеш жүгіну де әсер еткен. Ауру жұқтырған қалған науқастардың жағдайы тұрақты. Кейін ауылда карантин енгізілгені хабарланды.
Сол уақытта Абай қаласының кіреберісінде полиция бекеті қойылып, санитарлық тексеру жұмыстарын жүргізе бастады. Ал ауылға Жартас жақтан кіретін екінші жол жабылды. Сонымен қатар елді мекеннен мал және сүт өнімдерін алып кетуге немесе кіргізуге тыйым салынды. Мал союға және аумақтан жем-шөп тасуға да рұқсат жоқ.
Қауіпсіздік шарасын ойластырған облыстық Санитарлық-эпидемиологиялық бақылау департаменті жұқпалы дерттен қайтыс болған Топар ауылының тұрғынын мырышталған табытқа салып, жерледі. Басқарманың мәліметінше, ер адамды жерлеу кезінде аса қауіпті инфекцияның одан әрі таралуына жол бермеу үшін барлық санитарлық-эпидемиологиялық талапты сақтау қажет.
«Сібір жарасынан қайтыс болған адамдарды жерлеу эпидемияға қарсы режим талаптарын сақтай отырып, мырышталған, герметикалық табытта дезинфекциялау құралдарын пайдалана отырып жүргізіледі. Қабірлерді қазу, тасымалдау және мәйітті жерлеу үшін 3-5 адамнан тұратын топ жасақталады. Адамдарға жұмыстарды жүргізу тәртібі, жерлеу ерекшеліктері, қорғаныш костюмін пайдалану ережелері және жеке профилактикалық шараларды қатаң сақтау туралы мұқият нұсқау берілді», – деп хабарлады Қарағанды қалалық Санитарлық-эпидемиологиялық бақылау департаментінің баспасөз қызметі.
Аталмыш ведомство хабарлағандай, мәйітті жерлеу орнына жеткізу үшін оңай дезинфекциялауға болатын көлікті пайдалану керек. Жерлеуден кейін көлікті ғана емес, сонымен қатар барлық құралды, қорғаныс киімдерін мұқият дезинфекциялайды. Дезинфекция жерлеу орнында қатаң белгіленген ережелерге сәйкес жүргізілді.
«Жерлеуге қатысқан адамдар кезең бойынша дәрігерлердің бақылауында болады», – деп атап өтті облыстық Санитарлық-эпидемиологиялық бақылау департаменті.
Енді 15 күнге созылған карантин де, ауылға кіреберісте тұрған бағана да алынып тасталды. Ауыл шаруашылығы министрлігі Ветеринариялық бақылау комитетінің Қарағанды облыстық инспекциясы ауылда карантиннің алынып тасталғаны туралы қаулының күшіне енгенін мәлімдеді.
– Топар кентінде 9 қарашадан бастап карантин алынып тасталды. Шектеу шаралары кезінде арнайы пеште дерт анықталған өгізшенің еті жойылды, барлық қажетті алдын алу шаралары жүргізілді. Аулаларды аралау және дезинфекциялау жүргізілді, барлық малға вакцина салынды, халықпен әңгіме жүргізілді. Адамдар мен мал арасында инфекцияның жаңа жағдайлары анықталған жоқ. Бірақ жағдай бақылауда болады, – деді Ветеринариялық бақылау және қадағалау комитетінің Қарағанды облыстық аумақтық инспекциясының басшысы Ержан Бекетбаев.
Ауылда сібір жарасы анықталғаннан кейін осы аралықта адам да, мал да ауырмаған. Қазір ауылдағы барлық мал басына сібір жарасына қарсы екпе егілген. Сарапшылар инфекция көзін әлі іздестіруде.
– Малдың ауруды жем-шөп арқылы жұқтыруы мүмкін деген нұсқа бар. Өйткені қожайындары малын жайлауға шығармаған. Біз сынақ үшін бірнеше жем үлгілерін жібердік. Сынақ нәтижесін күтеміз, – деді Ауыл шаруашылығы министрлігі Ветеринариялық бақылау комитетінің Қарағанды облыстық инспекциясы басшысының орынбасары Данияр Мерғазин.
Сондай-ақ ол вакцинадан соң малды 14 күннен кейін ғана қатаң түрде тек арнайы белгіленген жерде және ветеринардың қарауынан кейін союға болатынын ескертті. Ауру жануарды союға тыйым салынады.
Толассыз жауған жауын да елді әбігерге салуда. Мал қазір жайылымда. Ал жаңбырдан кейін арнайы полигондарда көмілген төрт түлік өлексесі ашылып қалғанын айтады ауыл тұрғындары. Сондықтан «соған да назар аударса екен», – дейді олар.
Әдебиет БЕЛГІБАЙҰЛЫ