Шымкент қаласында жер сілкінісі тіркелді. Бұл туралы қалалық ТЖД-ның ресми өкілі Шәріп Асқар айтты, – деп хабарлайды Aikyn.kz Halyq Uni порталына сілтеме жасап.
– 2024 жылы 11 қаңтарда сағат 15:20 шамасында Шымкент қаласы бойынша жерасты дүмпуі тіркелді. Оның эпицентрі – Алматы қаласының оңтүстік-батысында орналасқан 856 шақырым жердегі Ауғанстан территориясы, – деді Шәріп Асқар.
Шымкент қаласының ТЖД қала тұрғындары мен қонақтарын сабыр сақтауға шақырды.
Мамандар жер сілкінген уақытта төмендегідей қарапайым 10 қағиданы есте сақтауға кеңес береді:
- Тыныштық сақтаңыз, үрейге бой алдырмаңыз;
- Жер сілкінісі кезінде лифтіні және баспалдақты пайдаланбаңыз;
- Жиһаз, терезе және люстрадан ары тұрыңыз;
- Жасырынатын жер тауып, басыңызды қолыңызбен жабыңыз.
- Жер сілкінісі тоқтағанда ғимараттан шығуға тырысыңыз.
- Алайда жер қайта сілкінуі мүмкін екенін естен шығармаңыз.
- Үйіңізден шығар алдында газды, суды және электр қуатын өшіріңіз.
- Тек ең қажет заттарды алыңыз.
- Ғимарат, ағаш және электр желілерінен аулақ жүріңіз.
- Қарттарға, балаларға және мүмкіндігі шектеулі жандарға көмек көрсетіңіз.