Абай облысының орталығы Семей қаласында синтетикалық есірткі саудасымен айналысқандар ұсталды. Олардан 1500-ден астам бір реттік доза тәркіленді, – деп хабарлайды Aikyn.kz.
ІІМ баспасөз қызметінің мәліметінше, семейлік полицейлер синтетикалық есірткіні ірі мөлшерде сатумен айналысқандардың жолын кесті. Ұсталған екі адамның үйін тінту кезінде салмағы 500 грамнан асатын «мефедрон» психотроптық заты тәркіледі. Күдіктілердің қылмыстық бизнеске қатысы барын растайтын ұялы телефондар табылды.
Осының нәтижесінде, 1500-ден астам бір реттік доза айналымға жіберілмеді. Олардың «қара нарықтағы» құны 20 млн теңгеден асады.
«Аталған факті бойынша қылмыстық іс қозғалды. Күдіктілер уақытша ұстау изоляторына қамауға алынды. Ер адамдар он бес жылға дейін бас бостандығынан айырылуы мүмкін», – дейді Абай облысы ПД бастығының орынбасары Нариман Күлдіков.