Іс-шараны ҚР Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов ашты.
Абай атындағы университетте сыбайлас жемқорлық туралы жиын өтті
865
оқылды

Абай атындағы Қазақ ұлттық педагогикалық университетінің Сорбонна-Қазақстан институтында Алматы қаласы жастарының қатысуымен «БҰҰ моделі: мемлекеттердің сыбайлас жемқорлыққа қарсы саясатын іске асырудағы жастардың рөлі» тақырыбында дөңгелек үстел өтті.

Іс-шараны Қазақстан Сыбайлас жемқорлыққа қарсы іс-қимыл агенттігі, Алматы қаласының әкімдігі, БҰҰ-ның Қазақстандағы өкілдігі және Абай атындағы ҚазҰПУ ұйымдастырды.

2023 жылдың басынан бастап Қазақстан Республикасының Сыбайлас жемқорлыққа қарсы іс-қимыл агенттігі іске асыратын «Сыбайлас жемқорлыққа қарсы волонтерлік» жобасы аясында еріктілер ретінде сыбайлас жемқорлыққа қарсы қызметке қатысу үшін белсенді азаматтар, қоғамдық бірлестіктер, кәсіпорындар мен ұйымдар тартылып жатыр. Бұл жобаға қатысушылардың бірі – Абай университетінің «Акселератор добра: Ізгілік Елшісі» еріктілері.

Жастарды адалдық, парасаттылық және әділдік рухында тәрбиелеу, сондай-ақ осы құндылықтарды олардың санасында бекіту Қазақстан Президентінің «Адал азамат» тұжырымдамасын іске асыруда шешуші рөл атқаратыны анық. Айта кетейік, «Акселератор добра: Ізгілік Елшісі» еріктілері мемлекетіміздің осы маңызды бастамасын іске асыруға белсене кірісті.

Іс-шараның үйлестірушісі Абай атындағы ҚазҰПУ Сорбонна – Қазақстан институтының директоры, ҚР Президентінің жанындағы Ұлттық құрылтай мүшесі, ҚР Сыбайлас жемқорлыққа қарсы іс-қимыл агенттігінің Қоғамдық кеңесінің мүшесі, ҚР Президентінің жанындағы Адам құқықтары жөніндегі комиссия төрағасының орынбасары Айнұр Сабитова болды. Ол сондай-ақ БҰҰ Жаһандық коммуникациялар департаментінің өкілі, БҰҰ Ақпараттық коммуникациялар департаментінің басшысы және Қазақстандағы БҰҰ бюросы Властимил Самекпен бірге аталған дөңгелек үстелді жүргізді. 

Іс-шараны ҚР Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов ашты. Сондай-ақ Абай университетінің  академиялық қызмет жөніндегі проректоры Бану Нарбекова жастар алдында құттықтау сөз сөйлеп, жастарға сәттілік тіледі.

БҰҰ шағын моделінің рухын көтеретін жастар ойыны Алматы қаласының белсенді жастарының тамаша қойылымдарымен жалғасты. Ойын барысында қатысушылар жастардың сыбайлас жемқорлыққа қарсы күреске жан-жақты тартылуын және олардың арасында парасаттылық, адалдық және сыбайлас жемқорлыққа мүлдем төзбеушілік қағидаттарының жоғары екендігін көрсете отырып, сыбайлас жемқорлықпен күрес жолындағы 30 түрлі елдің әлемдік тәжірибесін ұсынды.

Іс-шара тәжірибе алмасу форумы ғана емес, сонымен қатар жастар шешуші рөл атқаратын адал және жауапты қоғам құру жолындағы маңызды қадам болды.