Шетелдегі қазақ пен қырғыз балаларын өз халқының үлгі-өнегесімен тәрбиелеуді көздеген әріптес жандар «Қара, балам» атты жинақты жарыққа шығарды.
– Бұл нәрестелерге арналған кітапты ақ-қара түсте жасап шығардық. Себебі сәбилер алғашқы екі-үш айдан бастап алты айға дейін түрлі түсті бояуларды дұрыс көре алмайды. Әрі қазақ пен қырғыз халықтарының мәдениеті мен тілін жоғалтпай, балаларымызға да бергіміз келді, – дейді кітаптың авторы Айсалқын Ботаева.
Ал суретші Ерден Зікібай сәбиге төрт тілде мәлімет беретін жаңа жинақты безендіру кезінде қазақ оюларын зерттеп, ұлттық нақыштарға айрықша басымдық бергенін айтты.
– Қазақтың ою-өрнегі туралы Ералы Оспанов деген суретші жасаған осындай бірнеше кітап бар. Соларды мен жақсылап тұрып оқып, іздендім. Табиғат, жануар, солардың бейнелерін тікелей біздің ою-өрнектерімізге негіздеп жасадым. Себебі ата-бабаларымыздың жасаған суреттері мен қазіргі балалардың арасында байланысты үзбей жалғастырғым келді, – деді суретші Е.Зікібай.
Кітаптағы басты сурет – күн. Ол Қазақстан мен Қырғызстанның туында бар. Сондай-ақ Алатау тауларында кең таралған, ежелгі сақ дәуіріндегі алтыннан жасалған әшекейлердегі ілбіс бейнесі бар. Ол Алматы мен Бішкектің таңбасында бейнеленген. Суретші Ерден осы символдарды екі елді байланыстыратын белгі ретінде алған.