Облыс әкімі бүгінде Орал қаласында су тасқынынан зардап шеккендердің шығынын есептеу және материалдық көмек төлеу жөніндегі арнайы комиссия жұмысын бастағанын айтты.
Оралдағы саяжайлардың жағдайы назардан тыс қалмайды
525
оқылды

Батыс Қазақстан облысының әкімі Нариман Төреғалиев пен Орал қаласының әкімі Миржан Сатқанов тасқыннан зардап шеккен №1, 2, 3 және “Нұрлы жол” саяжайларының тұрғындарымен кездесті.

Кездесуге келген тұрғындар тарапынан өзектілігін жоғалтпай отырған бірқатар сұрақ қойылды. Тұрғындар су басқан саяжайларды қалпына келтіру, жаңа үй алу, әлеуметтік көмекке жүгіну және т.б мәселелер алаңдатып отыр. 

Әр зардап шеккен азаматқа тиісті көмек керсетілетін атап өткен облыс әкімі бүгінде Орал қаласында су тасқынынан зардап шеккендердің шығынын есептеу және материалдық көмек төлеу жөніндегі арнайы комиссия жұмысын бастағанын айтты. 

Н.Төреғалиевтің сөзінше, кезең-кезеңімен барлық саяжай техникалық зерттеуден өтеді. Тұрғындар көмексіз қалмайды. Бір жолғы әлеуметтік төлемдер беріліп жатыр. Аталған жұмыстар жалғасын табады. 

Бүгінде облыс бойынша зардап шеккен 2264 отбасыға, оның ішінде саяжайда тұратын 863 отбасы бар, 813 млн теңге көлемінде (100 айлық есептік көрсеткіш) біржолғы әлеуметтік төлем берілген. Алдағы уақытта тұрғындардан түскен өтініштер негізінде төлемдерді төлеу ісі жалғаспақ.

Облыс, қала басшылығы жиі кездесу өткізетін болады. Нариман Төреғалиев азаматтардың мәселелерін бақылауда ұстайтынын жеткізді. 

Атап өтерлігі, осыған дейін де тұрақты негізде саяжай тұрғындарымен кездесулер өткізілді. Алдағы уақытта да түсіндіру жұмыстары жалғасатын болады.