Рафхат 2023 жылы жазда анасынан адасып қалып, жоғалып кеткен үш жасар Айару есімді қызды тауып, ата-анасына аман-есен табыстаған болатын. Осы ерлігі үшін шекарашы жігіт «Ерлігі үшін» төсбелгісімен марапатталды.
Рафхат Тайкенжин – облыс шекарашылары арасында тұңғыш рет «Ерлігі үшін» медалін алып отырған адам. Қазақстан тәуелсіздігі жылдарында Батыстан бірде-бір шекарашы «Ерлігі үшін» төсбелгісін алмаған.
Жұрт ұйқыда жатқанда ел шетін кірпік қақпай күзететін шекарашылардың еңбегі ерлікпен пара-пар. Ұлттың тұтастығы мен қауіпсіздігі осы шекарашылардың қолында. Өмірін қауіпке тіге жүріп біздің шекарашылар қоғам өміріндегі басқа да оқиғаларға араласып жатады.
БҚО Жәнібек ауданы Ұзынкөл ауылында былтырғы тамыз айында полиция бөлімшесіне 3 жасар қыз баланың жоғалып кеткені туралы хабарлама түседі. Бүлдіршінді іздеуге дереу полиция мен еріктілер, ауыл тұрғындары жұмылдырылады. Кешкі 8-ден бастап түнгі 11-ге дейін жүргізілген іздеу нәтижесіз болып, ауыл тұрғындары шарасыз күйге түсе бастайды. Осы кезде «іздеу жұмысына шекарашылар қосылсын» деген бұйрық бойынша Жәнібек аудандық шекара заставасының шекарашылары 3 жасар бүлдіршінді іздеуге кірісіп кетеді. Іздеу жұмыстарын бастамас бұрын Рафхат Тайкенжин Айарудың киімдерін алып, оны қызметтік иті Ройтерге иіскетеді. Иә, бұл қызметтік ит адамның ізіне иіс бойынша түседі. Осылайша, Рафхат өзі қолына Айарудың киімін алып, итін ертіп ауылды шарлап кетеді. Осы кезде ізге түскен ит шекарашыны далаға қарай сүйрей береді. Өзі жастайынан алып, үйретіп, тәрбиелеп алған төрт аяқты серігіне сенген шекарашы ит жетелеген бағытқа еріп жүре беріпті.
– Ройтер ізге түсті. Ол Айару жүріп өткен із бойынша иіспен жүрді. Олар өте сезімтал болады. Сол ізбен ол мені далаға алып барды. Мен итке еріп әрі жүгірдім, бері жүгірдім. Шамамен 6 шақырымдай жүгірген болармыз. Бір мезетте Ройтер мені каналға қарай жетелей бастады. Каналдың түбіне келген бойда Ройтер үріп белгі берді. Жақындап қарасам, Айару екен. Қатты қорқып қалған. Сол күні күн қатты суық болды. Әсіресе, түн мезгілі кәдімгі ызғарлы еді. Айару қатты тоңып қалыпты. Қып-қызыл болып кеткен. Мен кішкентай бүлдіршінді дереу өзімнің қызметтік киіміме орап алып, ауылға тартып отырдым. Айаруды тапқанда сағат таңғы 4 еді, – деп еске алады сол күнді шекарашы Рафхат Тайкенжин.
Шекарашы қыз баланы дереу полиция бөлімшесіне алып келеді. Сол жерде бүлдіршінді дәрігерлер қарап, оның аман-сау екеніне көз жеткізіп, анасына табыстайды. Көпшілікті қыз бала қалай жоғалып кетті деген сұрақ мазалайды.
Шекарашының айтуынша, әйел адам қонақтан келе жатып, жолшыбай таксиге отырады. Ауыл маңында таксиден түсіп өзі үйіне кетіп қалған. Әйел адам қызым еріп келе жатыр деп ойлап, қызды іздемеген. Бір мезетте ғана қызының жоқ екенін біліп, дабыл қаққан.
– Отан қорғау – абыройлы міндет. Біздің бөлімшедегі әрбір қызметкер мұны терең сезінеді. Бөлімше ішіндегі темірдей тәртіп бәрінен маңызды. Әркім өз жұмысын жақсы біледі. Бір қарағанда шекарашылардың өмірі бір сарынмен өтіп жатқан бөлек бір әлем секілді көрінетін шығар. Алайда олай емес. Шекара маңында болған әрбір жағдай назарымыздан тыс қалмайды. Қарауымызда із кесуге машықтанған иттер бар. Өзім бір ерекше ерлік жасадым деп есептемеймін. Менің орнымда болса барлық адам осы бүлдіршінді тауып, анасына табыстар еді. Маған ол бүлдіршінді табуға көмектескен Ройтер есімді итім ғой, – деп күлді шекарашы Рафхат.
Рафхат негізінен осындай қызметтік иттерді жаттықтырумен айналысады. Ройтер де Рафхаттың өзі жаттықтырған сенімді серігі.
Олардың өмірі күнделікті қарбаласқа толы. Шекараны заңсыз кесіп өтпекші болғандарды ұстау, анықтау жұмыстары үздіксіз жүреді. Кешегі су тасқынында да шекарашылар шебі қалтқысыз қызмет етті. Өңірдегі шекарашылардың бәрі бөгет соғу жұмыстарына жұмылдырылды.
Жанат ҚАЙЫРҒОЖИНА,
Батыс Қазақстан облысы