Оған еліміздің 18 өңірінен 46 оқушы қатысты. Ұлттық олимпиада «Дарын» республикалық ғылыми-практикалық орталығы және «Астана дарыны» дарынды балалар мен талантты жастарды анықтау және қолдау орталығының әдістемелік сүйемелдеуімен өтті.
Ұлттық олимпиаданы қорытындылау рәсімінде сөз алған National Geographic Qazaqstan журналының бас редакторы Еркін Жақыпов олимпиаданың маңызына тоқталды.
«География – ғылымдардың атасы. Олимпиадаға қатысушылар осы ғылымды жүйелі меңгеріп, терең түсінді деп ойлаймын. Өйткені географияның бірінші миссиясы – жер планетасын аман алып қалу болса, екінші миссиясы – басқа планеталарды қатпарына дейін зерттеу. Ол да география ғылымының шеңберіне кіреді. Ұлттық олимпиада деген – бір-біріңізбен жарысу емес, өз мақсаттарыңызға бір қадам жақындау», – деді Е. Жақыпов.
Қатысушыларға берілген тапсырмалар ішіне National Geographic Qazaqstan журналында кездесетін материалдар да енгізілген. Сұрақтар оқушылардың жасына қарай құрастырылыпты. Бұл туралы олимпиадаға методикалық көмек көрсеткен Абай Дүйсен айтты.
«Олимпиада жүйесінде жүргеніме 15 жылдан астам уақыт болды. Биыл National Geographic Qazaqstan журналының ұйымдастыруымен өткен ұлттық олимпиада сұрақтарын құрастыруға, методикалық көмек көрсетуге шақырылдым. Халықаралық санатқа сай үш кезеңнен тұратын тапсырмалар құрастырдық. Олар: мультимедиалық, далалық және жазбаша. Олимпиаданың ерекшелігі далалық тапсырмаларды орындау кезінде байқалады. Ол масштаб, азимут, басқа да деректерге байланысты географиялық құралдарды пайдаланып, зерттеу жұмысын жүргізуге негізделген. Сұрақтар 7-8 сынып оқушыларына лайықтап, тілге жеңіл тапсырмалар бойынша құрастырылды», – деді олимпиада сұрақтарын құрастырушы.
Жүлделі орын иеленген оқушыларға марапаттар мен арнайы сыйлықтар берілді. Сондай-ақ қатысушыларға олимпиададан тыс қосымша білім беру мақсатында арнайы спикерлер лекция оқыды.
– Жарысқа Көкшетау «Білім-инновация» лицейінен келдім. Олимпиада қызық өтті, ұйымдастырылуы да керемет. Соңғы үш күн ішінде қорытынды кезең бойынша түрлі географиялық тың деректермен таныстық. Мамандар келіп қосымша сабақтар өткізді. Ұлттық олимпиадаға 1 жылға жуық уақыт дайындалдым. Интернет ресурстардан, жоғары сыныптың оқулықтарынан жаңа мәліметтермен танысып, соның нәтижесінде бүгін бас жүлдені жұлып алып, алтын медальға ие болып отырмын, – дейді жүлдегер Руслан Төлегенов.
География пәнінен өткізілген ұлттық олимпиаданың басты мақсаты – оқушылардың географияға деген қызығушылығын арттыру және географияның мектеп пәні ретіндегі мәртебесін көтеру. Айта кетейік, «Шеврон» компаниясы осымен екінші жыл қатарынан мектеп оқушылары арасындағы география олимпиадасының серіктесі болып отыр.
Сымбат БАУЫРЖАНҚЫЗЫ