Ашылу салтанатында Академияның ректоры Арман Жүдебаев қатысушыларды құттықтап, оларға сәттілік тіледі. Бұл іс-шараның авторы әрі бастамашысы – Болат Тұрғынбай, «Қазақстанның еңбек сіңірген қайраткері», «Көркемсурет» кафедрасының меңгерушісі, профессор.
Бұл байқауға «Қызғалдақ атауы неге берілді екен?» деп таңырқап жүргендер де аз емес. Қызғалдақ – Қазақстандағы мәдени рәміздердің бірі. Ол көктемнің ғана емес, сонымен бірге жаңа бастамалардың да символы. Қызғалдақ гүлі сонымен қатар бақытпен, махаббатпен және сұлулықпен де байланысты. Ол көбіне қазақтың дәстүрлі кестелерінде, киімдерінде және сәндік-қолданбалы, бейнелеу өнерінде қолданылады.
Зерттеушілердің пікірінше, қазір Қазақстан – қызғалдақтың отаны және таралу аймағы. Орталық Азияда кездесетін қызғалдақтың 64 түрінің 35-і Қазақстанда өседі, 18 түрі Қызыл кітапқа енген. Қазақ даласының сәні болған қызғалдақтар әр көктем сайын гүлдеп, республиканың барлық аумағы дерлік масаты кілемдей құлпырып, көздің жауын алады. Бұл асыра айтқандық емес, қазақ даласы шын мәнінде жер бетіндегі ең үлкен табиғи гүлзарға айналады.
Ашылу салтанатынан кейін іс-шара ұйымдастырушылары студенттерді сурет салуға арналған құралдармен жабдықтап, тапсырма берді. Пленерлік жұмыстар реализм бағытында орындалуға тиіс. Әр қатысушы пленэрде кескіндеме бойынша (майлы бояу, акрил, акварель,) екі жұмыстан жазады. Алғашқы күні олар Алматы қаласының көрікті жерлерінен этюд жазу мақсатында Панфилов көшесінің бойына шығып, өздері ұнатқан жерге жайғасты. Бұл сайысқа қатысу арқылы жас суретшілер өз кенептерінде Алматы қаласының сұлулығы мен бірегейлігін түсіруге мүмкіндік алды, сонымен қатар басқа елдерден ат терлетіп келген құрдастарымен мәдени және кәсіби дағдылар алмасты.
Биылғы бұл іс-шараға шетелден және Қазақстанның өзге өңірлерінен қатысқан студенттер саны 22 болды. Олардың арасында Корея, Өзбекстан, Қырғызстан елдерінен келген сайыскерлер бар. Конкурстық комиссия құрамына Темірбек Жүргенов атындағы ҚазҰӨА-сының профессор-оқытушылары, Қазақстанның белгілі суретшілері және шетелдік суретші мамандар кіреді.
Кореядан келген сайыскер Суен Кимнің айтуынша, ол бұл додаға өзге ұлттың студенттерінің жұмыстарын тамашалап, олардың ерекше түстерін көру мақсатында келген көрінеді. Аздап толқып тұрғанын да жасырмады.
«Qyzğaldaq-2024» ІV халықаралық студенттік байқау-пленэрінің қорытындылау күні 31 мамырда өткізілмек.
Арда КЕМЕЛ