Бірақ қазір қысқамерзімді курстарға бұрынғыдай сан толтыру үшін топырлатып оқыта бермейтін болыпты. Себебі қырғын адамды оқытып алып, жұмыссыз ретінде тек тіркеп отырудың пайдасы аз. Сондықтан қазір жұмыссыз адамды тек жұмыс берушінің сұранысына сай мамандыққа ғана оқытады. Тиісінше, оқуын аяқтаған маман сол компанияға тұрақты жұмысқа орналасады.
Гүлсім Сәбитованың жасы – 31-де. Үйде бала күтімімен отырған үш баланың анасы. Бірақ Гүлсім құр отырған жоқ. Өзі киім-кешек тігеді, соны сатып бала-шағасының нәпақасын тауып отырған әйел. Ол қысқамерзімді курстар туралы естіп тігіншіліктің қыр-сырын жетілдіру үшін оқуға келіпті.
– Мен бұрыннан тігін тігемін. Бала күнімде қуыршақтарыма қажетті көйлектерді өзім тіге беретінмін. Қазір де өзіме қажетті киімді тігіп кие беремін. Бірақ кәсіби маманның білімі мен үйретуі бөлек қой, бүгіннен бас- тап курстан өтіп жатырмын. Алдағы уақытта өзімнің жеке киім тігетін ательемді ашқым келеді. Сол үшін жұмысқа тұрып, тәжірибе жинақтасам ба деймін, – дейді Гүлсім.
Биыл облыс бойынша 350 жұмыссыз адам қысқамерзімді курстарға оқуға жіберіледі деп күтіліп отыр. Былтыр 250 адам оқыпты.
– Жыл қорытындысы бойынша, оқығандардың 90 пайызы жұмысқа орналасты, – дейді Еңбек мобильділігі орталығының директоры Саян Баймұханов.
– Қысқамерзімді курстарға біз жұмыс берушінің сұранысына сай оқуға жібереміз. Қазір бір мекеме 20 тігінші сұрады. Осы сұранысқа сәйкес, 20 қыз-келіншек білім алуда. Ертең күзге қарай газ операторларына сұраныс көбейеді. Міне, осылай сұранысқа орай оқытамыз. Тек оқыта беру бізге нәтиже бермейді. Біздің мақсат – жұмысқа тұруға жәрдем ету, – деп атап өтті С.Баймұханов.
БҚО-да жұмыссыздықпен күрес тұрақты түрде жүргізіліп келеді. Жұмыссыз азаматтарға бос орындар жәрмеңкесі арқылы жұмыс ұсынылып, кәсіпке икемі барларға грант беріліп, қайта оқудан өткізіп азаматтардың өз нәпақасын өздері тауып жеулеріне барынша мүмкіндік жасалып келеді. Сол жасалып жатқан жұмыстар мен қабылданған бағдарламалар өз жемісін беріп жүр ме? Сандарды сөйлетіп көрелік.
2024 жылдың алғашқы үш айындағы есеп бойынша, жұмыссыздық деңгейі – 4,8%, 15-35 жастар арасындағы жұмыссыздық деңгейі – 3,6%, әйелдер арасындағы жұмыссыздық деңгейі 5,8% құраған.
Ұлттық статистика Бюросының мәліметіне сәйкес, экономикалық тұрғыдан белсенді халықтың саны 353 147 адам, осының ішінен жұмыспен қамтылған халықтың саны 336 062 адам, жалдамалы қызметкерлердің саны 246 892 адам, соның ішінде өзін-өзі жұмыспен қамтығандардың саны 89 170 адам, ал жұмыссыз адамдардың саны 17 085 адамды құрап отыр.
– Биыл 22 815 адамды белсенді шаралармен қамту жоспарланған. Бүгінде 7 565 адам осы іс-шараларға тартылды. Мұның ішінде 5 599 адам тұрақты жұмысқа орналасты, – деп көрсетілген БҚО Жұмыспен қамтуды үйлестіру және әлеуметтік бағдарламалар басқармасының ресми сайтында.
Батыс Қазақстан облысы,
Жанат ҚАЙЫРҒОЖИНА