Маңғыстауда амал мерекесін тойлау кейінге шегеріледі. Бұл туралы облыс әкімінің орынбасары Қаныбек Жұмашев өңірлік коммуникация орталығында өткен брифингте мәлімдеді, деп хабарлайды Қазақпарат.
11 наурызда Дүниежүзілік денсаулық сақтау ұйымы COVID-19 жаңа коронавирустық инфекциясына байланысты пандемия жариялады. Ел президенті Қасым-Жомарт Тоқаев Қазақстанда коронавирустың таралуына жол бермеу жөнінде нақты міндеттер қойды. Осыған орай, ҚР Премьер-Министрінің орынбасары Ералы Тоғжанов БАҚ өкілдеріне арнайы брифинг өткізіп, қабылданған шаралар туралы хабардар етті.
Үкімет қабылдаған шешімге сәйкес, 13-14 наурыз күндері «Адай Ата – Отпан тау» рухани тарихи-мəдени кешенінде өтетін шара кейінге шегерілді. Шарада киіз үйлер тігіліп, 5000-ға жуық адам жиналатындықтан, түрғындардың қауіпсіздігін қамтамасыз ету үшін осындай шешім қабылданды.
«Амал мерекесі – татулықтың, келісімнің мейрамы. Ең бірінші кезекте адамның денсаулығы маңызды екенін түсінуіміз керек. Сондықтан ойымыз бір жерден шығып, ауызбіршілігімізді көрсетейік. Түсіністікпен қарауларыңызды сұраймыз», - деді сөз соңында Қ.Жұмашев.
Аймақтағы адам көп жиналатын мәдени шаралардың барлығы тоқтатылды.
