Қаңтар айында өтетін Ұлттық бірыңғай тестілеуге қатысу үшін өтініш беру 20 желтоқсанда басталып, 30 желтоқсанға дейін созылады, - деп хабарлайды Aikyn.kz.
ҰБТ-ға тіркелу Ұлттық тестілеу орталығының app.testcenter.kz сайтында немесе UTO арнайы қосымшасы арқылы жүргізіледі. Ал тестілеу 10 қаңтар мен 10 ақпан аралығында өтеді.
Қаңтардағы ҰБТ-ға шартты түрде ақылы негізде күндізгі оқу нысаны бойынша жоғары оқу орындарына қабылданған, жазғы ҰБТ нәтижелері бойынша шекті балл жинамағандар, шығармашылық ББТ-дан ақылы негізде басқа дайындық бағыттарына, педагогикалық бағытқа ақылы негізде ауысқысы келетіндер, сондай-ақ мектеп бітіретін түлектер жоғары оқу орындарына ақылы негізде түсу үшін қатысады.
Қатысушылар тестілеу өткізілетін орынды, күнді және уақытты өздері таңдайды.
ҰБТ-дағы пәндердің саны өзгеріссіз қалады, яғни үшеуі міндетті және екеуі таңдау бойынша.
ҰБТ тапсырмалар саны өзгеріссіз қалады, жалпы 120 сұрақ.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.