"Қазгидромет" синоптиктері 19, 20 және 21 желтоқсан күндеріне арналған ауа райы болжамын жариялады, – деп хабарлайды Aikyn.kz.
19 желтоқсаннан бастап еліміздің басым бөлігінде циклон әсерінен қар, бұрқасын, ал оңтүстік, оңтүстік-шығыс өңірлерде жауын-шашын (жаңбыр, қар), көктайғақ, жаяу бұрқасын, екпінді жел күтіледі.
19-20 желтоқсан күндері солтүстік-батыста, солтүстікте, орталықта, 20 желтоқсан күні оңтүстік-шығыстағы таулы аймақтарда қатты қар жауады.
21 желтоқсаннан бастап батыс антициклонының жылжуы әсерінен республиканың батысында ауа райы негізінен жауын-шашынсыз болады. Ал солтүстікте, оңтүстікте және орталықта ауа температурасы төмендейді деп күтілуде.
Сонымен қатар Қазақстанның басым бөлігінде тұман түседі деп болжанып отыр.
Түнде ауа температурасы батыста 3-13 градус аяздан 5-18 градус аязға дейін, ал шығыста 10-26 градус аяздан 7-20 градус аязға дейін ауытқиды.
Еліміздің өзге облыстарында ауа температурасы айтарлықтай төмендейді:
- түнде солтүстік-батыста, солтүстікте 10-20 градус аязға дейін,
- орталықта 13-25 градус аязға дейін,
- республиканың оңтүстігінде, оңтүстік-шығысында 7-13 градус аяз,
- таулы аудандарда 15-18 градус аязға дейін.