CNBC телеарнасының хабарлауынша, Microsoft жасанды интеллектің жұмыс жүктемелерін өңдейтін жаңа деректер орталықтарын құруды көздеп отыр. Aikyn.kz осы ақпаратқа сүйеніп, корпорация жоспарының негізгі шығыстарын талдайды.
Microsoft корпорациясы OpenAI-ге (ChatGPT чат-боты) 13 миллиард доллардан астам инвестиция салды. Фото Reuters агенттігінен алынды. Авторлығы: Lucy Nicholson
Microsoft президенті Брэд Смиттің айтуынша, корпорация жасанды интеллект жұмыс жүктемелерін өңдей алатын деректер орталықтарын салуға 80 миллиард доллар жұмсамақшы. Оның жартысынан астамы Америка Құрама Штаттарында игеріледі.
Жаңа деректер орталықтарын салуға 2025 қаржы жылы қомақты қаржы бөлетінін корпорация жұма күні (3 қаңтар) жариялады. Microsoft корпорациясының 2025 қаржы жылы маусым айында аяқталады.
«Бүгінгі таңда Америка Құрама Штаттары жеке капиталды инвестициялаудың және динамикалық стартаптардан бастап құрылған кәсіпорындарға дейінгі барлық көлемдегі америкалық компаниялардың инновация арқасында жаһандық ЖИ жарысында көш бастады. Microsoft мұны OpenAI-мен серіктестігіміз, Anthropic және xAI сияқты өсіп келе жатқан фирмалар, сондай-ақ ЖИ-ді қолдайтын бағдарламалық жасақтама платформалары мен қолданбалары арқылы жақсы сезуде», – дейді Брэд Смит.
Брэд Смит: «АҚШ үшін ең жақсы жауап – бәсекелестікке қиналмай, әлемдік жарыста жеңіске жету». Фото nytimes.com сайтынан алынды. Авторлығы: Eric Lee
Бірнеше үздік технологиялық компаниялар Nvidia-ның ЖИ үлгілерін оқытуға және іске қосуға арналған графикалық процессорларын сатып алуға миллиардтаған қаражат жұмсауға асығуда. 2022 жылдың соңында іске қосылған OpenAI-дің ChatGPT көмекшісінің нарықты жылдам жаулап алуы басқа компаниялардың өздерінің генеративті ЖИ үлгілерін жасаудағы жарысын күшейтті.
OpenAI-ге 13 миллиард доллардан астам инвестиция салған Microsoft корпорациясы бұл стартапты бұлтты инфрақұрылыммен қамтамасыз етеді және оның үлгілерін өзінің Windows, Teams және басқа өнімдерін енгізді.
Microsoft бүкіл әлем бойынша күрделі шығындар мен активтерге 20 миллиард доллар жұмсағанын хабарлады, оның 14,9 миллиард доллары 2025 қаржылық жылдың бірінші тоқсанында жылжымайтын мүлік пен жабдықтарға жұмсалды. Күрделі шығындар екінші қаржылық тоқсанда дәйекті түрде өсетінін қазан айында Microsoft бас қаржы директоры Эми Гуд растаған болатын.
Visible Alpha сауалнамасына қатысқан сарапшылар 2025 фискалды жылы корпорация негізгі құралдар мен жабдықтар сатып алуға 63,2 миллиард доллар жұмсайтынын болжаған еді. Бұл өткен жылмен салыстырғанда 42%-ға өсуді білдіреді.
Microsoft корпорациясы әлемдік ЖИ бәсекесінде Американың Қытайды басып озуына көмектеседі. Фото uctoday.com сайтынан алынды
Microsoft корпорациясының Azure және басқа да бұлттық қызметтерінен түскен табысы бірінші қаржылық тоқсанда 33%-ға өскен, оның 12 пайызы ЖИ қызметтерінің үлесіне тиесілі.
Брэд Смит қарашада сайланған президент Дональд Трамптың жаңа әкімшілігін білім беру және америкалық жасанды интеллект технологиясын шетелде ілгерілету арқылы жасанды интеллектегі ұлттық көшбасшылықты сақтап қалуға шақырды.
«Қытай дамушы елдерге субсидияланған чиптерді қолжетімді бағамен ұсына бастады және жергілікті ЖИ деректер орталықтарын салуға уәде бере бастады. Қытайлықтар егер дамушы ел қытайлық ЖИ платформасын негізге алса, ол (мемлекет) болашақта осы платформаға сенуді жалғастыра беретінін жақсы түсінеді. Бұл – ақылды шешім», – дейді Microsoft корпорациясының басшысы.
Оның ойынша, АҚШ үшін ең жақсы жауап – бәсекелестікке қиналмай, әлемдік жарыста Американың жеңіске жетуін қамтамасыз ету керек. Ол үшін америкалық ЖИ-ді жоғары балама ретінде алға жылжытып, басқа елдерге жылдам тарату үшін тиімді әрекет ету қажеттігін саясаткерлер де, менеджерлер де, инженерлер де жақсы түсіне бастаған сияқты.
Сауда және технологиялық соғысты доғарып, шынайы нарықтық бәсекеге көшуге АҚШ пен Қытай дайын ба? Әлемдік экономиканың басты мәселесі осында.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.