«Мың бала» ұлттық олимпиадасының мақсаты – ауылдық жерлердегі дарынды балаларды анықтайтын және оларға қолдау көрсету. Қазақстандағы 160 мыңнан астам ауыл оқушысының 60%-ын қамту жоспарда бар, – деп хабарлайды Aikyn.kz.
Бес жылда олимпиадаға ауыл мектептерінде оқитын 754 мыңнан астам 6-сынып оқушысы қатысты. Олардың ішінде 1800-ге жуық оқушы дарынды балаларға арналған мектептерге оқуға тегін қабылданды.
Биылғы «Мың бала» олимпиадасына тіркелу 10 ақпан мен 10 наурыз аралығында 1000bala.elumiti.kz сайтында өтеді.
«Мың бала» олимпиадасы екі кезеңнен тұрады. I кезең онлайн форматта өтеді. 1 сәуір мен 10 сәуір аралығында 1000bala.elumiti.kz сайтында тестілеуден өту қажет.
Тестілеу екі бөлімнен тұрады: логикалық ойлау, кеңістіктік ойлау. Тест 40 сұрақты қамтиды және шамамен 90 минутты алады. Тестілеуден камерасы бар ноутбук арқылы немесе интернетке қосылған веб-камерасы бар компьютерден тапсыруға болады. Сондай-ақ, қатысушылар тестілеуден өз мектептерінде немесе өңірлік «Дарын» орталықтарында өте алады. Облыстар бойынша ең жоғары қорытынды балл жинаған бес мың оқушы олимпиаданың II кезеңіне өтеді.
Олимпиаданың екінші кезеңі 28-30 сәуір аралығында өтеді. Бұл кезеңде қатысушылар мынадай пәндер бойынша академиялық білімдерін бағалау үшін компьютерлік тестілеуден өтеді: математикалық сауаттылық, қазақ тілінде оқытатын оқушылар үшін қазақ тілі, орыс тілінде оқытатын оқушылар үшін орыс тілі, ағылшын тілі, жаратылыстану. Тест 100 сұрақтан тұрады және 150 минутқа созылады.
Жеңімпаз оқушылар Дарын, Білім-инновация лицейі, Республикалық физика-математика мектебінде тегін оқиды.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.