«AMANAT» партиясы Шығыс Қазақстан облыстық филиалының партиялық бақылау комиссиясының төрағасы Мұхтар Төлеген Шемонаиха ауданына жұмыс сапарымен барып, аудан басшысы Дидар Кеңесбаевпен және мәслихат депутаттарымен бірге «Халықпен бірге!» сайлауалды бағдарламасының орындалуын бақылау мақсатында мониторинг жүргізді, – деп хабарлайды Aikyn.kz.
Комиссия мүшелері, ең алдымен, Шемонаиха қаласында салынған жаңа 300 орындық жайлы мектепке барды. Партия өкілдері сынып бөлмелерін, спорт залын, АӘД кабинетін, асхананы, акт залын, еңбекке баулу және робототехника кабинеттерін аралап, балалардың ойын және даму бөлмелерінің жабдықталуын тексерді. Қазіргі уақытта құжаттарды рәсімдеу жұмыстары жүргізілуде.
Кейін партия мүшелері Волчанка ауылына барып, ауылдық округ әкімі Ботакөз Сикпаевамен бірге ауылдық дәрігерлік амбулаторияның құрылыс жұмыстарының барысын қарады. Ғимараттың қабырғалары толық тұрғызылып, шатыр орнату жұмыстары жүріп жатыр. Қазіргі таңда құрылыс алаңында 5 маман жұмыс істеуде.
Сапар қорытындысы партиялық бақылау комиссиясының отырысында қаралды. Жиынға аудан әкімінің орынбасары Данияр Уахитов, басқарма басшылары және Жол картасы бойынша бекітілген мәслихат депутаттары қатысты.
«AMANAT» партиясының «Халықпен бірге!» сайлауалды бағдарламасының орындалуы – біздің басты міндетіміз. Партиялық бақылау арқылы біз халықтың өмір сүру сапасын жақсарту бағытында жүргізіліп жатқан жұмыстардың ашықтығын қамтамасыз етеміз. Шемонаиха ауданындағы мектеп құрылысы мен дәрігерлік амбулаторияның салыну барысы – осы бағыттағы маңызды қадамдардың бірі. Сонымен қатар өңірде алдағы су тасқыны кезеңіне дайындық барысына ерекше көңіл бөлдік. Жол картасын сапалы орындау, құрылыс жұмыстарын бақылау және төтенше жағдайларға алдын ала дайын болу – біздің басты басымдықтарымыз. Партиялық бақылау жалғасады», – деп атап өтті Шығыс Қазақстан облыстық филиалының партиялық бақылау комиссиясының төрағасы Мұхтар Төлеген.
Сондай-ақ жиында Шемонаиха ауданы әкімінің азаматтық қорғаныс және мобилизациялық даярлық жөніндегі басты инспекторы Сағдат Келдиев су тасқынына дайындық барысы туралы баяндама жасады. Аудандық және мемлекеттік органдарға, аумақтық партия бөлімшелеріне Жол картасының сапалы орындалуын қамтамасыз ету, құрылыс нысандарына партиялық және қоғамдық бақылауды күшейту, сондай-ақ мүмкін болатын су тасқыны жағдайларына толық дайын болу жөнінде ұсыныстар берілді.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.