Онда депутаттар денсаулық сақтау, ойын бизнесі және артық заңнамалық регламенттеуді болғызбау мәселелері туралы заңды екінші оқылымда қабылдап, екі халықаралық құжатты ратификациялады.
Денсаулық сақтау саласындағы нормалардың артық заңнамалық регламенттелуін болғызбау мәселелері туралы заңнамалық түзетулерді Мәжіліс былтырғы 25 желтоқсанда бірінші оқылымда мақұлдады. Заң жобасы бойынша жұмыс тобының жетекшісі Дәулет Мұқаев депутаттар құжаттың мазмұны бойынша жұмыс барысында оны айтарлықтай пысықтап, бірқатар түзету енгізгенін айтты.
Енді тегін медициналық көмектің кепілдік берілген көлемі аясында көрсетілетін қызметтер тізіміне онкологиялық ауруларды ерте анықтауға арналған скринингтік тексерулер енгізілетін болады. Есту қабілеті бұзылған, медициналық себептер бойынша мүгедектігі жоқ қазақстандықтарды жергілікті бюджет есебінен әкімдіктер есту аппараттарымен қамтамасыз етеді.
Мәжіліс депутаттарының бастамасымен Денсаулық сақтау министрлігінің қарамағындағы ғылыми-зерттеу институттарына резидентура бағдарламалары бойынша оқытуды өз бетінше жүзеге асыру, ал бейінді бағыттар бойынша докторантураны даярлау бағдарламаларын медициналық жоғары оқу орындарымен бірлесіп оқыту құқығы беріледі. Денсаулық сақтау саласына қатысты өзге де нормалар ұсынылды.
– Заң жобасымен жұмыс аясында депутаттар бас бостандығынан айыруға немесе шартты түрде бас бостандығынан айыруға байланысты емес жазаға сотталған адамдардың құмар ойындарға қатысуына тыйым салуға, сондай-ақ букмекерлік кеңселерді немесе тотализаторларды жарнамалауға қатысты заңнаманы қатаңдатуға бағытталған түзетулер енгізді. Заң жобасымен реттелетін салалардың кеңеюіне байланысты оның атауы: «Қазақстан Республикасының кейбір заңнамалық актілеріне денсаулық сақтау, ойын бизнесі және артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» болып өзгертілді, – деді Д.Мұқаев.
Талқылау қорытындысы бойынша депутаттар заңды екінші оқылымда қабылдап, Сенаттың қарауына жіберді.
Сонымен қатар Мәжіліс Қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топ туралы келісімге және Қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топтың бюджетін қалыптастыру және атқару тәртібі туралы ережеге өзгерістер енгізу туралы хаттаманы ратификациялады. Оның нормаларымен Қаржылық мониторинг агенттігі төрағасының орынбасары Жеңіс Елемесов таныстырды.
Қарастырылып отырған хаттамада Еуразиялық топтың бюджетін қалыптастыру көздері көрсетілген. Атап айтқанда, тұжырымдамалық аппарат «ерікті жарна», «мақсатты ерікті жарна», «басқа да түсімдер (кіріс)» және «мақсатты қор» анықтамаларымен толықтырылған. Басқа да техникалық түзетулер енгізілді. Бүгінде Еуразиялық топқа мүше тоғыз мемлекеттің сегізі, оның ішінде Қазақстан да құжатты ратификациялады.
Бұдан соң депутаттар былтырғы 25 наурызда Астана қаласында жасалған Қазақстан мен Кипр арасындағы сотталған адамдарды беру туралы келісімді ратификациялады. Құжат жөнінде баяндаған Бас прокурордың орынбасары Ғалымжан Қойгелдиев бұл келісім арқылы елдеріміз қылмыстық іс жүргізу саласында толық құқықтық база қалыптастыратынымызды айтты. Ол 2022 жылы Кипрмен құқықтық көмек көрсету және ұстап беру туралы келісімдерге қол қойылып, олар 2023 жылы ратификацияланғанын еске салды.
– Бұл келісімнің маңызы зор. Әлеуметтік тұрғыдан қарасақ, шетелде сотталған азаматтарымызды елімізге әкелу олардың туыстарынан қол үзбей, қоғамға тез бейімделуіне оң ықпал етеді. Кипрде отандастарымыз құқық бұзып, сотталған жағдайда осы шарттың көмегімен оларды елге қайтара аламыз, – деді Ғалымжан Қойгелдиев.
Сондай-ақ Мәжіліс депутаттары Сенаттың Бюджет кодексіне, сондай-ақ «Қазақстан Республикасының кейбір заңнамалық актілеріне бюджет заңнамасын жетілдіру мәселелері бойынша өзгерістер мен толықтырулар енгізу және «Концессиялар туралы» Қазақстан Республикасы Заңының күші жойылды деп тану туралы» заңға енгізген өзгерістерімен келісті.
Палата комитеттері жаңа заң жобаларын, атап айтқанда, Әкімшілік құқық бұзушылық туралы кодекске өзгерістер мен толықтырулар енгізу туралы, «Жер қойнауы және жер қойнауын пайдалану туралы» кодекске су ресурстарын қорғау және пайдалану мәселелері бойынша өзгерістер енгізу туралы, 2004 жылғы 22 желтоқсандағы Қазақстан мен Ресей үкіметтері арасындағы «Байқоңыр» ғарыш айлағында «Бәйтерек» ғарыш зымыран кешенiн құру жөніндегі келісімге өзгерістер енгізу туралы хаттаманы ратификациялау жобасын жұмысқа қабылдады.
Мейір ЖАСЫН