Нұртас Кәріпбаевтың айтуынша, соңғы жылдары елімізде туризм саласы қарқынды дамып келеді. Мәселен, 2024 жылдың 9 айында ішкі туристер саны 562 мыңға артып, 6 миллионға жеткен. Ал сол жылы Қазақстанға шетелден келген турист саны 15,3 миллионға жетіпті. Былтырдың өзінде бұл салаға құйылған инвестиция көлемі артып, негізгі салынған капитал – 947,5 миллиард теңге. 2023 жылмен салыстырғанда 20,3%-ға артқан. Жалпы, еліміз бойынша инвестициялар өсімі 15 өңірде байқалды.
– Бүгінде отандық туризм экономиканың маңызды драйверіне айналатын мүмкіндікке ие. Сондықтан осы мүмкіндікті барынша пайдаланып, саланы қарқынды дамытуымыз тиіс. Былтыр Мемлекет басшысы туризмді дамыту жөнінде кеңес өткізді. Кеңесте нақты бағыт-бағдар белгіленіп, Маңғыстау өңірінде туризмді дамыту қолға алынып, «Жылы жағажай» туристік аймағын толық іске қоспақ. Бұл жоба өңірдің ішкі және шетелдік туристер үшін тартымдылығын арттырып, инфрақұрылымды жақсартуға ықпал етеді. Туристік аймақтың қалыптасуы – шағын және орта бизнестің дамуы, жаңа жұмыс орындарының ашылуы, қосымша салық түсімдерінің ұлғаюына жол ашады. 2 мыңға жуық жаңа жұмыс орны құрылып, өңір экономикасы жанданады, – деді Нұртас Кәріпбаев.
Оның айтуынша, мұндай өсім Маңғыстау облысында ғана емес, Шығыс Қазақстан өңірлерінде де байқалады. 2024 жылдың қаңтар-қыркүйек айларында Маңғыстау облысына 367 401 турист келсе, Шығыс Қазақстан облысына 334 188 турист келген.
– Қазір Шығыс Қазақстанда экотуризм мен белсенді демалысқа арналған мүмкіндіктер кеңейіп келеді. Қатонқарағай ұлттық паркі, Марқакөл, Белуха тауы, Зайсан көлі – Қазақстанның ең көркем табиғи орындарының біріне айналуда. Бұл жақтарға ел-жұрттың қатынауын реттеу үшін Зайсан мен Қатонқарағайда жаңа әуежайлар салынады. Көлік министрлігінің ақпаратына сәйкес, Зайсан әуежайы бұрынғы Сәтбаев атындағы әскери әуе айлағы аумағында орналасады. Бастапқы кезеңде 2 200 метрлік ұшу-қону жолағы салынып, Q400, ATR 42/72, CRJ200 сияқты ұшақтарды қабылдай алады. Кейін аталған жолақты 2 600 метрге дейін ұзарту жоспарланған, бұл Airbus A320 және Boeing 737 секілді үлкен лайнерлерді қабылдауға мүмкіндік береді, – дейді Туризм индустриясы комитетінің төрағасы Нұртас Кәріпбаев.
Қатонқарағай әуежайы Қатонқарағай ауылынан 38 шақырым жерде, Солдатово ауылы маңында салынады. Бұл әуежайдың да инфрақұрылымы Зайсан әуежайына ұқсас: 2 200 метрлік ұшу жолағы бастапқы кезеңде шағын ұшақтарды қабылдайды. Кейін оны 2 600 метрге дейін ұлғайту жоспарланған. Нәтижесінде, табиғи қорықтар мен ұлттық парктерге туристердің сапары айтарлықтай жеңілдейтініне сенімді басшы.
– Қазір Маңғыстау облысының 2025-2029 жылдарға арналған кешенді даму жоспары әзірленуде. Мемлекет басшысының тапсырмасымен Кендірлі демалыс аймағын дамытуға арналған кешенді жоспар әзірленіп, жоба аясында жаңа қонақүйлер, демалыс кешендері салынады, аймақтың туристік әлеуетін арттыру үшін Кендірліде әуежай құрылысы қолға алынды.
Кендірлі әуежайы Жаңаөзен қаласынан 60 шақырым, Кендірлі курортынан 13 шақырым жерде салынады. Алғашқы кезеңде ұзындығы 2 200 метрлік, ені 35 метрлік жолақ пайдалануға беріледі, кейін оны 2 600 метрге дейін ұзарту қарастырылған. Бұл нысан Астана мен Алматыдан туристердің тікелей ұшып келуіне мүмкіндік береді, осылайша еліміздің ішкі туризмін дамытуда үлкен рөл атқарады, – деді Туризм индустриясы комитетінің төрағасы Нұртас Кәріпбаев.