Солардың бірі – саналы ғұмырын әскери салаға арнаған тәжірибелі шекарашы, өскелең ұрпақты білім нәрімен сусындатып жүрген, өнегелі тәлім-тәрбие беру ісінің білікті кәсіби офицері полковник Жұлдыз Жампейісова.
Шекара академиясында өзіндік ойып тұрып орнын алған полковникті бәрі жақсы біледі. Өйткені ол – өзіне жүктелген жауапты міндеттің үдесінен шығып, шәкірт тәрбиелеп жүрген ұлағатты ұстаз. Ағылшын тілін жетік меңгертіп, дүниетанымдарын жетілдіруінің арқасында курсанттар ғылыми-тәжірибелік конференцияларда, семинарларда, ғылыми сайыстарда жүлделі орындарды иеленіп, оза шауып келеді. Шет тілдер кафедрасының профессорлық-оқытушылық құрамымен ай сайын жоғары әдістемелік сабақтарды ұйымдастырып өткізу – оның ең сүйікті ісі. Шалғайдағы мемлекеттік шекараны қорғаушы болашақ маман офицерлерге тіл үйретіп, көкірегіне нұр шашқан кейіпкеріміз ұлттың айнасы болуға әбден лайықты. Жақында ғана оның тікелей жетекшілігімен Шекара академиясының курсанты әл-Фараби атындағы Қазақ ұлттық университетінде өткен «Фараби әлемі» атты Халықаралық ғылыми-практикалық конференциясына қатысып, жүлдегер атанды.
Кейіпкеріміз – ғасырға жуық тарихы бар ҰҚК Шекара академиясында қызмет атқара жүріп, «лейтенант» погонынан «полковник» шеніне дейін жеткен қазақтан шыққан санаулы қыздардың бірі.
Өз ісіне жанымен берілген Жұлдыз Ғизатқызымен қызмет бабында жиі кездесеміз. Қызметінің әр минутын жүйелі пайдалануға, сабағына тиянақты дайындалуға дағдыланған жан. Өзін-өзі дамытып, ғылым-білімге әбден ден қойған көзі ашық, көкірегі ояу тәжірибелі маман. Сонымен қатар кафедра, факультеттің, Шекара академиясының қоғамдық жұмыстарына да белсене атсалысады.
Жұлдыз Ғизатқызы өзінің жолдасымен Шекара академиясының қабырғасында оқып жүріп, өрімдей жап-жас курсант кезінде танысқан. Сол жылдары қос ғашықтың достығы үлкен махаббатқа ұласқан еді. Осылайша, отбасын құрып, алтын асықтай ұл мен күміс қасықтай қыз тәрбиелеген ата-анаға айналған қос полковник бүгінде үлгілі әулетке айналды.
Бүгінде күнтізбелік әскери қызмет өтілі 25 жылдан асқан нәзікжанды полковник өзінің шекарашы мамандығын таңдағанын мақтан тұтады. Иә, ептілік пен қырағылықты, өжеттік пен қайсар мінезді талап ететін әскери салада қызмет атқару екінің бірінің қолынан келе бермейтін үлкен еңбек деп білеміз.
Жанат ЖАБЫРБЕКОВ,
ҰҚК Шекара академиясының баспасөз хатшысы