Қарағанды облысында жүздеген қыз-келіншек Қарулы күштер сапында өз міндеттерін абыроймен атқаруда.
«Күміс алқа» иегері – Мөлдір
2015 жылы ант қабылдап, әскер қатарына қосылған Мөлдір Қонысбаева – көпбалалы ана. Ол үш қызы мен үш ұлын тәрбиелеп өсіріп отырған жан. Былтыр «Күміс алқа» иегері атанған ол, отбасымен бірге әрқашан қызметте белсенді. Мөлдір кез келген іс-шараға қатысып, өз үлесін қосуға тырысады. Балалары да үлгілі оқушылар қатарынан.
Мөлдір мен жолдасының танысқаны қызықты әрі ерекше: олар бір күні танысып, келесі күні отбасын құрып, қазірде алты баланың ата-анасы атанып отыр. Ол өзінің бақытты екенін, өміріндегі барлық жетістіктері үшін жолдасының үнемі қолдау көрсетіп келе жатқанын жасырмайды.
ФелЬдшер Толғанай
Толғанай Баделханқызы Қарағанды жоғарғы медициналық интерколледжінде фельдшер мамандығы бойынша білім алған. Қарағанды қаласында жедел жәрдем №5 стансасында фельдшер болып қызмет етті. 2023 жылдың қазан айында 31775 әскери бөлімінде 1 мотоатқыштар батальонының бөлімше командирі – фельдшер лауазымына тағайындалды. 2024 жылы кезекті сержант атағын да алды.
Толғанайдың өмірі – еңбек пен табандылықтың, кәсібилік пен адалдықтың үлгісі. Оның қарым-қатынасы, қызметке деген жауапкершілігі мен қайсарлығы жастарға үлгі. Мәдениетті, саналы әрі жауапкершілігі мол арулардың болашақта еліміздің дамуына қосар үлесі көп болатынына сенеміз. Жас ару еліміздің Қарулы күштері арасында өтіп жатқан «Әскер аруы» фотобайқауына қатысып жатыр. Қазір елімізде мұндай арулардың көптігі қуантады.
Телефонист Индира
Қарағанды гарнизонының 36352 әскери бөлімінде қызмет атқаратын 33 жастағы телефонист Индира Сарыбаева – сыртқы нәзіктігі мен әйелдік сұлулығына қарамастан, мықты және төзімді жан.
Индира Қарағанды қаласындағы жоғары политехникалық колледжге оқуға түсіп, құтқарушы мамандығы бойынша білім алған. Ол оқу барысында альпинизммен айналысып, жүзуді үйреніп, апаттық жағдайда адамдарды іздеп, құтқару, алғашқы медициналық көмек көрсету дағдыларын меңгереді. Сондай-ақ түрлі табиғи жағдайда тірі қалу курстарынан өткен және жағдайға байланысты қалай баспана құру, су табу және тамақтану ережелерін үйренеді.
Оның өміріндегі басты өзгеріс 70 шақырым қашықтыққа жүк арқалап, жүкті жаттығу барысында тауларда жасаған жорығы болды. Бұл жорық оның қайсарлығын, шыдамдылығын және күшін көрсетті. Алайда мамандығы бойынша жұмыс істеу оған бұйырмады. Оның өмірі жаңа бағыт алды. Балаларымен бірге болуды шешіп, көп жыл декреттік демалыс алды.
2019 жылы Индира өміріндегі жаңа белеске қадам басып, әскери қызметке кірді. Бүгінде ол 36352 әскери бөлімінде телефонист болып қызмет етеді.
Әдебиет БЕЛГІБАЙҰЛЫ,
Қарағанды облысы