Quartz сайтында жарияланған қысқаша хабарламадан туындаған үлкен ойлармен Aikyn.kz өз оқырмандарымен бөліседі.
Билл Гейтс: «Біздің қазіргі дәуір – бұл интеллект сирек кездесетін дәуір. ЖИ арқылы келесі онжылдықта бұл тегін әрі кең таралған нәрсеге айналады». Фото toppan.co.th сайтынан алынды
Билл Гейтстің айтуынша, болашақтағы жұмыс форматы мүлде өзгеше болуы мүмкін. Оны өзгертетін – жасанды интеллект (ЖИ). Microsoft-тың іргесін қалаған тұлға болашақта адамдар аптасына екі күн ғана жұмыс істейтін болады деп санайды.
Ол бұл туралы The Tonight Show бағдарламасында Джимми Фэллонмен сұхбат барысында айтып, мынадай гипотетикалық сұрақ қояды: «Болашақта жұмыс орындары қандай болмақ? Біз аптасына екі-үш күн ғана жұмыс істеуіміз керек пе?».
Гейтстің ойынша, технологиялық серпіліс адамзат өмірін түбегейлі өзгертеді. Жасанды интеллект денсаулық сақтау және психикалық денсаулық саласындағы маман тапшылығы сияқты жаһандық мәселелерді шешуге көмектесетін болады. Бұл еңбек нарығына әсер етіп, «интеллект» туралы түсінігімізді де өзгертеді.
«Біздің қазіргі дәуір – бұл интеллект сирек кездесетін дәуір, – дейді Гейтс бүгінгі дарынды дәрігер мен ұстаздың маңызын атай отырып. – ЖИ арқылы келесі онжылдықта бұл тегін әрі кең таралған нәрсеге айналады».
Билл мен Мелинда Гейтс арнайы қор құрып, қайырымдылықпен айналысады. Фото newsru.com сайтынан алынды
Билл мен оның әйелі Мелинда Гейтс арнайы қор құрып, қайырымдылықпен айналысады. Қор технологияларды денсаулық сақтау, білім беру және климат саласындағы жаһандық мәселелерде қолдану бойынша жобаларды қаржыландырады.
«Бастапқы код» атты жаңа кітабында Билл Гейтс ЖИ-дің Альцгеймер, безгек және АИТВ сияқты аурулармен күрестегі әлеуетіне тоқталады. Ол сондай-ақ бес жасқа дейінгі африкалық балалардың өліміне себепкер болатын полиомиелитті жою бағытындағы жұмысымен таныстырады.
«Егер жолымыз болса, алдағы үш-төрт жылда полиомиелит толығымен жойылатын келесі ауру болады», – дейді Билл Гейтс.
Миллиардер климаттың өзгеруіне қатысты да үмітін үзбейтінін айтады. Оның пікірінше, инновациялар жасыл технологиялар саласында анағұрлым тиімді әрі қолжетімді шешімдерге жол ашады.
«Бізге өте арзан жасыл өнімдер жасау керек», – дейді ол. Оның айтуынша, дұрыс технологиялық жаңалықтар арқылы болашақ көпшіліктің күткенінен де жарқын болуы мүмкін. Бұл жерде ЖИ шешуші рөл атқарады. Дегенмен ол бұл процестің сызықты емес, яғни күрделі және күрт өзгерістерге толы болатынын ескертеді.
«Адамдар таза өнімдер үшін көбірек төлеуге дайын болуы керек, бірақ жаһандық деңгейде олар мұны жасай қоймайды», – деп түйіндеді Гейтс.
Қазақтар білім мен ғылыми жаңалықтарды экспорттау арқылы мол табыс таба алады. Фото newsoveraudio.com сайтынан алынды
Басқа елдер 2 күн жұмыс істегенде қазақтар 3 күн жұмыс істесе, бай бола ма?
Жоқ, бай бола алмайды. Өйткені мәселе тек қанша күн немесе қанша сағат жұмыс істегенде емес, қандай іспен айналысатыныңда, оның қаншалықты бағалы, әлемдік нарықта сұранысқа ие екенінде.
Қазір бүкіл әлем цифрланып жатыр – жасанды интеллект, IT мен жаңа технологиялар, киберқауіпсіздік. Байлықтың бәрі – осы салаларда. Қазақ баласы да Қазақстанда отырып-ақ фриланс, стартап, аутсорс арқылы әлемдік нарықта жұмыс істей алады. Ол үшін ғылым керек, терең білім керек. Ғылым – байлықтың нағыз қайнар көзі. Білім мен ғылыми жаңалықтарды экспорттау арқылы мол табыс табуға болады.
Қазақ еліндегі мол жер ресурсы мен табиғи байлық – бізге берілген ерекше мүмкіндік. Бірақ малды бұрынғыдай бағып, шөп шапқанмен бай болмаймыз.
Экспортқа бағытталған экологиялық таза, органикалық агроөнімдер арқылы әлемдік нарықта қазақ брендін жасауға тиіспіз. Үкіметтің бағдары осыған ауғаны маңызды. Бұл – халықты бай жасайтын стратегия. Жоғары сапалы брендтелген өнімдерді – қымыз, шұбат, ет, киіз, жүн, зергерлік бұйымдар – бәрін заманауи маркетингті қолданып, қымбат бағаға сатуға болады. Сублимация әдісімен жасалған бие сүті Saumal бренді – осы сөзімізге дәлел.
Қазақ баласы агробизнестен де, креативті индустриядан да миллиардтар таба алады. Бірақ оған ғылым мен білім керек! Фото dimashnews.com сайтынан алынды
Креативті индустрия (музыка, кино, анимация, әдебиет пен ойындар, этно-дизайн) арқылы да миллиардтар табуға болады. Біздің нарығымыз кішкентай. Сондықтан барлық өнім шетелдік нарықтың сұранысына ыңғайлап жасалуы керек. Қазақ фольклоры, аңыздары, эпостары – әлемдік деңгейге лайық контент! Қазақтың домбырасы мен Димаш Құдайбергендей таланттар арқылы ұлтымыздың мәдени мұрасын миллиардтаған доллар табысқа айналдыратын мүмкіндіктер бар.
Бай болғымыз келсе, ұлттық бірегейлігімізді брендке айналдыру керек. Фото dimashnews.com сайтынан алынды
Бүгінгі дәуірдегі байлық күрекпен тәулігіне 12 сағат құм қазып, оны қаппен шетелге арзанға сатумен құралмайды. Бүгінгі байлыққа жету жолы – ғылымға негізделген өндіріс, ақылды, құнды және тиімді кәсіппен айналысу.
Қазақтың ертеңгі бай әлеуеті – тек елімізде ғана емес, сыртқы нарықтардағы тұтынушыны қызықтыратын өнімді, істі табумен байланысты. Бай болғымыз келсе, әлемдік деңгейде ойлап, ұлттық бірегейлігімізді брендке айналдыра білейік! Халқымыздың саны 20 млн ғана болғандықтан, Үкімет нарық пен экономика заңдарына ғана сенбей, азаматтардың іскерлік бастамаларына қамқоршылық жасап, оларды жетектеп, шетелдік тұтынушыға жетуіне көмектесуі керек. Халықтың байлығын өсіріп, тұрмысын жақсартып, ұлттың тұрақты дамуын қамтамасыз еткеннен басқа – мемлекетте бөтен міндет болмауы тиіс.
Жұмыс аптасын мына әзіл видеомен бастаңыз:
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.