Эстрада жұлдызы, әнші Абай Бегей Ақтауда әйелі Фаризаның туған күнін дүркіретіп атап өтіп, басы тағы бір дауға ілікті. Түн ішінде болған отшашу көршілердің мазасын алып, көптің наразылығын тудырды, – деп хабарлайды Aikyn.kz.
Түнде тыныштықты бұзды
Әншінің әйелі Фариза әлеуметтік желіде туған күнін атап өтіп жатқан сәттен видео жариялап, сол сәтте аспанға атылған салют елдің наразылығын тудырған. Тұрғындардың бірі желіде:
«Туған күн құтты болсын! Бірақ түнгі 00:00-де қатты музыка қойып, салют атқаныңыз дұрыс болмады. Балам шошып, бір сағат жылады. Біз сіздің дәл қасыңыздағы көршіміз», — деп жазды.
Заңда не дейді?
Қазіргі заңнамада мұндай әрекет үшін әкімшілік жаза көзделген. 2025 жылдың 10 қаңтарынан бастап күшіне енген жаңа өзгерістер бойынша, Әкімшілік құқық бұзушылық туралы кодекстің 434-бабында («Ұсақ бұзақылық») 20 АЕК мөлшерінде айыппұл, 5-тен 15 тәулікке дейін қамауға алу немесе 20-дан 60 сағатқа дейін қоғамдық жұмысқа тарту түріндегі жаза қарастырылған. Егер құқықбұзушылық бір жыл ішінде қайталанса, жаза мерзімі де артады.