Бұл – мемлекет тарапынан көрсетіліп отырған қолдаудың және медициналық сақтандыру жүйесінің артықшылықтарының айқын дәлелі. Жуырда өткен баспасөз туры аясында БАҚ өкілдері №1 қалалық клиникалық аурухананың жұмысы және МӘМС шеңберінде енгізілген жаңашылдықтармен танысты.
Аталған аурухана Шымкент қаласы мен оған жақын аудан тұрғындарына тәулік бойы мамандандырылған, жоспарлы және шұғыл медициналық көмек көрсетеді. 530 төсек-орынға лайықталған мекемеде тәжірибелі дәрігерлер – доценттер, медицина ғылымдарының кандидаттары, жоғары және бірінші санатты мамандар қызмет етеді. Мұнда заманауи диагностикалық және емдеу құрылғылары, соның ішінде Arkau innovation ангиографиялық аппараты орнатылған. Бұл жабдық ауруларды ерте анықтап, жоғары дәлдіктегі араласу жасауға мүмкіндік береді. Аурухана базасында жүкті және босанған әйелдерге арналған мамандандырылған хирургиялық орталық жұмыс істейді. Сонымен қатар мұнда күрделі медициналық араласулар – панкреатодуоденальды резекциялар, бауыр мен өт жолдарына, асқазан-ішек жүйесіне, жамбас буындары мен сүйектеріне жасалатын оталар сәтті орындалуда.
Ең ірі жаңалықтардың бірі – Philips Azurion 7 B20 ангиографиялық жүйесімен жабдықталған операциялық блоктың ашылуы. Бұл жүйе ми тамырларына, инсульт кезінде шұғыл араласуға және нейрохирургиялық оталарға жоғары дәлдік береді. Жабдықтың құны 995 млн теңгеден асады, алайда ол МӘМС аясында тұрғындарға тегін қызмет көрсетуге мүмкіндік береді. МӘМС жүйесінің арқасында аурухана базасында 100-ге жуық буын эндопротездеу операциясы тегін жасалған. Әр отаның нарықтағы бағасы шамамен 1,5 млн теңге болса да, тұрғындар бұл көмекті сақтандыру есебінен алған. Эндопротездер АҚШ-та өндірілген, сапасы жоғары медициналық өнімдер.
Аурухана бүйрек пен бауыр трансплантациясы бойынша да республикада алдыңғы қатарда. Бүгінге дейін 237 бүйрек және 32 бауыр трансплантациясы жасалып, барлығы сәтті өткен. Бұл науқастардың өмір сапасын түбегейлі жақсартып, екінші мүмкіндік сыйлады.
Қазір бүйрек пен бауырда жиналған тастарды хирургиялық араласусыз алу мүмкіндігі бар. Мұндай процедуралар жоғары дәлдіктегі литотриптор аппараты арқылы жасалады. Ол тастың тығыздығы мен көлеміне қарай (1500–1800 HU және 1,5–2 см) тиімді жұмыс істейді. Бұл жабдықтың ерекшелігі – елімізде тек осы ауруханада қолжетімді болуы. Сондықтан ем алуға Шымкентпен қатар, Тараз, Қызылорда, Алматы, Астана, Қостанай, Көкшетау өңірлерінен де науқастар келеді.
Шымкент қалалық Денсаулық сақтау басқармасы басшысының орынбасары Бақытжан Абдуллаевтың айтуынша, міндетті әлеуметтік медициналық сақтандыру жүйесі халықтың сапалы емге қолжетімділігін арттырды. Бұрын миллиондап бағаланатын күрделі оталар бүгінде сақтандыру аясында тегін жасалуда. «МӘМС – тұрғындардың денсаулығын сақтаудағы сенімді қорған. Жаңа технологиялар мен жоғары білікті мамандардың арқасында біз көптеген ауыр дертті дер кезінде анықтап, тиімді емдеу мүмкіндігіне ие болдық», – дейді ол. Шымкенттегі №1 қалалық клиникалық аурухана – заманауи жабдықтар мен білікті мамандар шоғырланған орталық. МӘМС аясында мұнда тегін көрсетілетін жоғары технологиялық қызметтер тұрғындарға тек денсаулығын қалпына келтіруге емес, өмір сапасын жақсартуға да мүмкіндік беріп отыр.
Назгүл НАЗАРБЕК,
Шымкент қаласы