Онда депутаттар Қазақстаннан келген жұмысшыларды Қатарда жұмысқа орналастыруды реттеу туралы келісімді және дамушы елдерді ескере отырып, ең төменгі жалақыны белгілеу туралы конвенцияны ратификациялады.
Отырысты ашқан Ерлан Қошанов Мемлекет басшысының осы дүйсенбіде жариялаған Жолдауының ел дамуындағы ерекше рөліне назар аударды.
– Жалпы, бұл жолғы Жолдау Президентіміздің «барлық реформаның өзегі – адам» деген басты қағидатты үздіксіз ұстанып келе жатқанын тағы да дәлелдеді. Қасым-Жомарт Тоқаев маңызды бастамалар көтерді. Алдағы жұмыстың аясын айқындап, нақты мерзімін белгілеп берді. Біздің ендігі міндетіміз – Үкіметпен, азаматтық қоғаммен бірге тығыз әрекет ете отырып, Жолдаудағы барлық бастаманы жедел түрде заңнамалық тұрғыда қамтамасыз ету, – деді Мәжіліс Төрағасы.
Осы орайда Ерлан Қошанов Парламент жұмысындағы бірнеше негізгі бағытқа тоқталды. Олардың қатарында Цифрлық кодекс пен жасанды интеллект туралы заңды қабылдау, банк саласындағы заңнаманы жаңарту, инновациялық Alatau City қаласын дамытудың құқықтық негізін қалыптастыру және басқа да заң жобалары бар. Сонымен қатар Президент алға қойған міндеттерді жүзеге асыру әр депутаттың, әр фракцияның қажырлы еңбегі мен белсенді жұмысын қажет ететінін баса атап өтті.
Ерлан Қошанов Мемлекет басшысы ұсынған партиялық тізім бойынша құрылатын бір палаталы жүйеге көшу туралы ауқымды парламенттік реформаға да жеке тоқталды.
– Кешегі Жолдауында Президент келешектегі бір палаталы Парламентті партиялық тізіммен жасақтауды ұсынды. Бұл партиялардың рөлін де, беделін де арттыра түседі. Биліктің мызғымас институты ретінде қалыптастырады. Белсенді азаматтар өз ұстанымы мен көзқарасына сай келетін партияға мүше болу арқылы Парламентке келіп, елдің тағдырына араласа алады. Мұндай жүйе әлемдік тәжірибеде кеңінен тараған. Сондықтан барлық фракцияны, депутаттарды осы жүйелі әрі прогрессивті реформаны қолдауға шақырамын, – деді Мәжіліс Төрағасы.
Бұл ретте Палата спикері мемлекетіміздің болашағына қатысты тағдыршешті мәселенің бәрі халықтың талқысына салынатынын айтты. «Шешім қабылдауды халықтың өзіне беру – Президентке тән ашық басқару стилі» екенін атап өтті.
Жалпы, отырыс барысында мәжілісмендер 2024 жылғы 14 ақпанда Доха қаласында жасалған Қазақстан мен Қатар үкіметтері арасындағы Қазақстаннан келген жұмыскерлерді Қатарда жұмысқа орналастыруды реттеу жөніндегі келісімді ратификациялады. Құжатты депутаттарға Еңбек және халықты әлеуметтік қорғау министрі Светлана Жақыпова таныстырды.
Келісім Қазақстан азаматтарына Қатарда ресми түрде жұмысқа орналасуға жол ашады және олардың құқықтарының қорғалуына кепілдік береді. Оның аясында қатарлық жұмыс берушілер қазақстандықтарға бару-қайту рейстерімен, жайлы баспанамен, жұмыс орнына тасымалдау, кемінде үш апталық жыл сайынғы ақылы еңбек демалысымен және басқа да шарттармен қамтамасыз етуге міндетті.
– Біз көптеген қазақстандық жақсы өмір іздеп шетелге жұмысқа кететінін білеміз, бірақ көбіне қиындықтарға тап болады. Бұл құжат осындай тәуекелдерді жоюдың маңызды қадамы. Келісімді іске асыру еңбек көші-қоны институтына деген сенімді арттырады, Қатармен екіжақты қатынасты күшейтеді және мемлекетіміз үшін жаңа экономикалық мүмкіндіктер туғызады деп сенемін, – деді жұмыс тобының жетекшісі Асылбек Нұралин.
Мәжіліс дамушы елдерді ерекше ескере отырып, ең төмен жалақыны белгілеу туралы конвенцияны (№131 конвенция) ратификациялады. Оның негізгі ережелерімен депутаттарды Еңбек және халықты әлеуметтік қорғау министрі Светлана Жақыпова таныстырды.
Жұмыс тобының жетекшісі Ардақ Назаров №131 Конвенцияны ратификациялау Қазақстанның ең төменгі жалақыны айқындайтын қолданыстағы тәсілдерін халықаралық деңгейде бекітуге мүмкіндік беретінін айтты. Сондай-ақ Қазақстанның осы саладағы халықаралық стандарттарды сақтау және енгізу жөніндегі міндеттемесін растайды.
Талқылау барысында депутаттар баяндамашы мен жауапты мемлекеттік органдардың өкілдеріне ең төменгі жалақыны ұлғайту, ең төменгі жалақыны сағатына төлеуге көшу мүмкіндігі, Үкіметтің ішкі жалпы өнім құрылымындағы жалақының үлесін арттыру жоспарлары, конвенцияда қарастырылған мүгедектігі бар адамдарға қатысты кемсітушілікке жол бермеу тетіктері, Халықаралық еңбек ұйымы ережелерін сақтамаған жағдайдағы санкциялар және басқаларға қатысты сұрақтарын қойды.
Сонымен қатар Мәжіліс комитеттері бірқатар жаңа заң жобасын жұмысқа қабылдады. Олардың қатарында Қазақстандағы банктер және банк қызметі туралы заң жобасы мен оған қаржы нарығын реттеу және дамыту мәселелері бойынша ілеспе түзетулер, сондай-ақ Қазақстан мен Перу арасындағы ұстап беру туралы, сотталған адамдарды беру туралы және қылмыстық істер бойынша өзара құқықтық көмек туралы шартты ратификациялау жобасы, жоғары білім беру саласындағы біліктілікті тану туралы Азия-Тынық мұхиты өңірлік конвенциясын, 1992 жылғы Шекарааралық су арналары мен халықаралық көлдерді қорғау және пайдалану жөніндегі конвенцияға Су және денсаулық проблемалары туралы хаттаманы ратификациялау туралы заң жобалары бар.
Жалпы, отырыс соңында мәжілісмендер мемлекеттік органдарға өзекті әлеуметтік-экономикалық мәселелер бойынша 21 депутаттық сауал жолдады. Олар Мәжілістің ресми сайты мен телеграм арнасында жарияланды.