Іс-шараға «AMANAT» партиясы республикалық қоғамдық қабылдау бөлмесінің консультанттары Сағындық Жылқыбаев пен Әсел Қожахметова, сондай-ақ қала және аудан әкімдігінің қызметкерлері, құқық қорғау органдарының өкілдері мен кәсіби заңгерлер қатысты. Олар азаматтардың жеке өтініші мен арыз-шағымын тыңдап, тиісті шешім қабылдауға атсалысты.
Қабылдауда тұрғындар негізінен жолды жөндеу, аумақты жарықтандыру, сапалы ауызсумен қамтамасыз ету және балалар ойын алаңшасын салу мәселесін көтерді.
Қала тұрғыны Сәбит Бейсенбаев балаларға арналған ойын алаңының ескі элементтері қауіп төндіріп отырғанын айтып, жаңарту қажетін жеткізді.
«Балаларға арналған ойын алаңын жаңартып берсе деген ұсыныспен келдім. Ескі ойын элементтері балаларға айтарлықтай қауіп төндіреді. Осындай қауіптің алдын алса екен деп өтінішімді жеткіздім», – деді ол.
Шымкент қалалық мәслихатының депутаты Абзал Зейнетаев тұрғынның өтініші назардан тыс қалмайтынын атап өтті.
«Ауланы абаттандыру, балалар алаңын салу және жаңарту жұмысы қала аумағында кезең-кезеңімен тұрақты түрде жүргізіліп келе жатыр. Бұл мәселе де арнайы хаттамаға енгізіліп, тиісті мекемеге жолданады. Қадағалауға алынып, алдағы уақытта шешімін табады», – деді депутат.
Қабылдау барысында айтылған ұсыныстың бірқатары сол мезетте шешімін тапса, кейбір мәселелер зерделеуді қажет ететіндіктен, арнайы хаттамаға енгізіліп, бақылауға алынды.
Тұрғындардың әлеуметтік және тұрмыстық түйткілдерін шешуге бағытталған «Құқықтық көмек» жобасы тұрақты түрде жалғасын тауып келеді. Жыл басынан бері қала аумағында 253 қоғамдық қабылдау өткізіліп, 1 997 азаматтың өтініші қаралған. Соның 71 пайызы оң шешімін тауып, қалғанына заң аясында түсініктеме берілген. Бұдан бөлек, қалалық және аудандық филиалдарға 8 171 жеке шағым түсіп, олардың 82 пайызы қанағаттандырылды.
«AMANAT» партиясы алдағы уақытта да мұндай қоғамдық қабылдауларды ұйымдастырып, халықтың өтініші мен ұсынысының орындалуына тікелей бақылау жүргізетін болады.
Елнар ЕЛТАЙ