Спорт кешені заманауи талаптарға сай салынып, 32 мыңнан астам тұрғыны бар ауыл халқына спорттың бірнеше түрімен айналысуына мүмкіндік жасалған. Жаңа нысанда футбол, волейбол, баскетбол алаңдары мен үстел теннисі қойылған. Сондай-ақ мұнда бұқаралық спорт түрлерімен айналысатын мекеме орналаcқан. Бұл өз кезегінде спортты дамытуға серпін бермек.
Нысанның ашылу салтанатына Байзақ ауданының әкімі Олжас Баққараев, «AMANAT» партияcы Байзақ аудандық филиалының төрағасы Индира Спаналиева және спортты жанына серік еткен азаматтар қатысты.
«AMANAT» партияcының Байзақ аудандық мәслихатындағы фракция мүшесі, аудандық мәслихаттың төрағасы Бақтияр Ақбаевтың айтуынша, бұл денешынықтыру-сауықтыру кешені ауылда бұқаралық спортты дамытуға, азаматтардың денсаулығын жақсартып, жастардың бос уақытын тиімді өткізуіне мол мүмкіндік бермек.
«AMANAT» партиясының сайлауалды бағдарламасы аясында аудан орталығында денешынықтыру-сауықтыру кешені ашылып отыр. Бұл аудан халқының бұқаралық спортпен айналысуына үлкен септігін тигізетін болады. Әсіресе, жастардың спортпен шұғылдануына мол мүмкіндік беріп отыр. Ауданның барлық ауылында партияның cайлауалды бағдарламасын орындау мақсатында стрит-аркаут және кіші футбол алаңдары ашылған. Соның нәтижесінде Байзақ ауданында бұқаралық спортпен айналысушылардың саны 42 пайызға жетіп отыр. Әрине, бұл белгіленген меже емес. Алдағы уақытта бұл көрсеткіш арта беретін болады, – дейді Бақтияр Ақбаев.
Ал ауыл тұрғыны, еркін күрестен КСРО спорт шебері, ауданның құрметті азаматы Алмас Сағымбеков бұған дейін ауылда спорт кешені болмағанын баса айтты.
«Бұған дейін ауылда балалар мен жастардың спортпен тұрақты айналысуына мүмкіндік болмады. Сондықтан бірнеше рет облыс басшылығына хат та жазып, өтінішімізді жеткізген едік. Енді, міне «AMANAT» партиясының сайлауалды бағдарламасы аясында спорт кешені ашылып қуанып жатырмыз. Көк Туымызды желбіретер спортшылар көптеп шықсын десек, оларға жағдай жасалуы керек. Бүгінгі нысан да соның айқын дәлелі деп білемін, – деді спорт ардагері.
Денешынықтыру-сауықтыру кешенінің құрылысы 2023 жылы басталып, барлық стандартқа сай салынып отыр. Құрылысты «Век Stroy-2010» ЖШС жүргізген. Бұл кешен ауыл жастары мен тұрғындардың бос уақытын тиімді өткізуге, сондай-ақ спортпен тұрақты айналысуға жол салып отыр.
Партияның пәрменімен сайлауалды бағдарлама аясында бой көтерген нысан көпшіліктің көзайымына айналатыны анық. Әрі мұндай нысандар алдағы уақытта да көптеп салынатынына бек сенімдіміз.
Саятхан САТЫЛҒАН,
Жамбыл облысы