Quartz сайтына сілтеме жасаған Aikyn.kz фастфуд алыбы клиенттерге қандай жаңалықтар ұсынатынын түсіндіреді.
Жақында McDonald's жаңа жаһандық McDonald's > NEXT стратегиясын жариялады. Компания басшылығы бұл бастаманы Лас-Вегаста өткен дүниежүзілік конференцияда таныстырды. Жаңа стратегия мәзірді жаңартуға, мейрамханаларды қайта жобалау мен автоматтандыруды кеңейтуге бағытталған. McDonald's бас директоры Крис Кемпчински қазіргі нарықтағы бәсекенің бұрынғыдан әлдеқайда қатал екенін айтады.
«Бүгінде кез келген мейрамханаға бір батырманы басу арқылы тапсырыс беруге болады. Бұндай әлемде екінші орын деген болмайды», – дейді ол.
Компанияның пікірінше, болашақтағы негізгі бәсеке бургерлер үшін емес, тауық өнімдері, сусындар және тұтынушы тәжірибесі үшін жүреді. Соңғы жылдары Chick-fil-A, Raising Cane's сияқты желілер McDonald's-тың дәстүрлі клиенттерінің бір бөлігін өзіне қайтарып алған. Сондықтан жаңа стратегияда тауық еті өнімдеріне ерекше көңіл бөлінуде.
McDonald's-тің жаһандық клиенттермен жұмыс жөніндегі директоры Джилл Макдональд мәзірдің сапасын арттыру басты басымдыққа айналғанын айтады.
«Біз сапа мен тұрақтылық деңгейін көтеріп, клиенттер үшін жаңа өнімдер ұсынамыз», – дейді ол.
Жаңа стратегияның тағы бір маңызды бөлігі – автоматтандыру. АҚШ-тағы бес мейрамханада ARCHY деп аталатын автоматтандырылған тапсырыс қабылдау жүйесі сынақтан өтуде. Оның мақсаты – қызметкерлерді қарапайым операциялардан босатып, клиенттерге қызмет көрсету сапасын өсіру.Сарапшылардың пікірінше, бұл өзгеріс бүкіл фастфуд индустриясының болашағын айқындайды. Алдағы жылдары жасанды интеллект пен автоматтандырылған жүйелер тапсырыс қабылдау, асүй жұмысын ұйымдастыру және жеткізу қызметтерінде кеңінен қолданылатын болады.
McDonald's үшін тағы бір маңызды мәселе – баға саясаты. Reuters жариялаған зерттеуге сәйкес, АҚШ-та McDonald's-ты «ақшаға лайық жақсы ұсыныс» деп есептейтін тұтынушылар үлесі 2020 жылғы шамамен 55%-дан 2024 жылы 40%-ға дейін төмендеген. Бұл бірнеше жыл бойы мәзір бағасының өсуімен байланысты болған. Кемпчинскидің айтуынша, компания әрбір клиенттің сенімін қайтадан жеңіп алуы тиіс.
«Клиенттердің әрбір келуі үшін біз қайта-қайта күресуіміз керек», – дейді ол.
McDonald's > NEXT стратегиясы фастфуд алыбының жаңа дәуірге бейімделу үшін күресін көрсетеді. Компания тек тағам сататын орын болуды емес, технология, қызмет көрсету және клиент тәжірибесін біріктіретін экожүйе құруды көздейді. Егер бұл жоспар сәтті жүзеге асса, McDonald's әлемдік фастфуд нарығындағы көшбасшылық орнын сақтап қала алады.