Алматы қалалық сотында Александр Пакқа қатысты қылмыстық іс бойынша апелляциялық шағым қаралды, – деп хабарлайды Aikyn.kz сайты.
Жол-көлік оқиғасынан қаза тапқан қыздың әкесі бірінші сатыдағы сот белгілеген 10 миллион теңге көлеміндегі моральдық зиян өтемақысын 100 миллион теңгеге дейін ұлғайтуды сұраған.
Сот материалдарына сәйкес, талапкер Александр Пактың кінәсіне, әрекетінің құқықтық саралануына немесе тағайындалған жазаға қарсылық білдірмеген. Апелляциялық шағым тек моральдық зиян өтемақысының мөлшеріне қатысты берілген.
Өз кезегінде сотталған Александр Пактың қорғаушылары апелляциялық шағымды қанағаттандырмауды сұрады.
Сот алқасы бірінші сатыдағы соттың шешімін өзгертуге негіз жоқ деген қорытындыға келді. Қаулыда моральдық зиян үшін өндірілетін өтемақы сотталған адамға қосымша жаза қолданудың құралы емес екені атап өтілген.
Сондай-ақ алқа бірінші сатыдағы сот өтемақы мөлшерін белгілеу кезінде материалдық немесе процестік құқық нормаларын бұзбағанын көрсетті. Соттың бағалауынша, өндірілген 10 миллион теңге өтемақы келтірілген рухани зардаптың сипатына, қылмыстың мән-жайына, сотталғанның кінә дәрежесіне сәйкес келеді және әділдік пен парасаттылық қағидаларына сай.
Осылайша, Алматы қаласының Қылмыстық істер жөніндегі мамандандырылған ауданаралық сотының 2026 жылғы 22 маусымдағы үкімі өзгеріссіз қалдырылды.