Дәм-тұз бұйырып 2016 жылы қасиетті Жамбыл ауданының «Атамекен» газетіне тілшілік қызметке қабылдандым. Құрылғанына 87 жылдан асқан қара шаңырақтың тарихы тереңде. Осы рухани ордада жазушы Нағашыбек Қапалбеков, Күмісжан Байжан, ақын Есенқұл Жақыпбек тәрізді танымал қаламгерлер газетті әр жылдары басқарған. Бүгінгі күні ақын Рәтбек Терлікбаев – бас редактор.
«Атамекен» газетін жиырма жылдан астам басқарған Күмісжан Құдайбергенқызы – оқығаны мен көңілге түйгені мол, алысты болжайтын, салмақты, сабырлы және әр ісіне жауапкершілікпен қарайтын жан.
Аудан халқы Күмісжан Байжанды қадірлейді, жақсы көреді. Көпшіліктің қолы жете бермейтін С.Киров атындағы Қазақ мемлекеттік университетінің Журналистика факультетін ойдағыдай аяқтаған соң, Күрті аудандық «Шұғыла» газетінде журналистік еңбектің түрлі сатысынан сүрінбей өткен кездері өз алдына бір әңгіме. Сосын 1986 жылдан бастап аудандық «Екпінді еңбек» газетінде бас редактор болып, оның өсіп-өркендеуіне, оқырманның сүйікті басылымына айналуына өлшеусіз үлес қосады. Осы жылдары аудандық партия комитетінің бюро мүшесі, аудандық кеңестің бірнеше шақырылымына депутат болып сайланғанын, жиындарда ақты ақ, қараны қара деп, кемшілікті тайсалмай айтқанын әріптестері әлі ертегідей айтып жүр.
Шерхан ағаның шекпенінен шыққан деген керемет ұғым бар. Сол айтқандай, Күмісжан әпкенің шекпенінен қаламы қарымды жазушы-ақындар Манарбек Ізбасаров, Нүсіпбай Әбдірахым, Серік Сатыпалды, Жаныстан Кучукова, тағы басқа ондаған қаламгер тәрбиеленіпті. Бір қызығарлығы – қарымды қаламгер жайлы қызметтес журналистер ол кісі басқарған жылдары ұжымда ерекше ұйымшылдық, молшылық, мейірімділік, бауырмалдық, шыдамдылықтың лебі ескенін қызыға әңгімелейді. Мерекелерде дастарқан жиылмайтын және әрқайсымызға үлкен жауапкершілік, сенім артылатын. Қызметін адал атқаратын. Біреудің ала жібін аттамайтын адалдығы екінің біріне бұйырмайтын қасиет деп сағына айтатыны бар.
«Жақсы адам елдің басшы серкесіндей, жұғымды болар елге еркесіндей» деп жыр сүлейі Сүйінбай Аронұлы жырлағандай, Күмісжан әпкем ұжымдағы көптеген қызметкердің үй алуына қол ұшын беріп, тұрмыстық жағдайларына қарайласыпты. Редакция ұжымына анасындай қамқор, бауырмал болған. Еліне ерен еңбек сіңірген журналистика саласының ұлағатты ұстазының есімі ұмытылмайтыны содан болар.
«Газет – халықтың көзі, құлағы һәм тілі» деп баспасөздің ел өміріндегі алатын орны туралы Ахмет Байтұрсынұлы айтқандай, газет редакциясы оқырман қауымның рухани, мәдени ордасы екені анық. Шығармашылық жетегіндегі журналистерге жүрегі жұмсақ басшының бағасы алтыннан қымбат. Себебі, шығармашылық еркіндік пен түсіністікте қанатын кеңге жайып, тарығу мен қысымшылық көрсетпегеннің өзі үлгі аларлық-ау. Сол үшін редакцияда темірдей тәртіппен қатар рухани демалысты, әлеуметтік жағдайды қатар алып жүргені басшыға ерекше сын емес пе?!
Алматы облысының Талдықорған қаласының Жамбыл ауданының Құрметті азаматы Күмісжан Байжан бүгінде өзі басқарған аудандық «Атамекен» газетінің редакциясына жиі бас сұғып тұрады. Қызметкерлердің жағдайынан хабардар болып, жанашырлық көзқарас танытатынын әрқайсымыз сезінеміз.
Қызметке орналасқалы бері киелі мекенде туып-өскен бабалары мен бауырларының өмірінен жинақтаған «Жамбыл елінің жайсаңдары» атты энциклопедиялық жинағы оқырман қауымға жол тартты. Оның алдында жер-су тарихынан сыр шертетін тағылымы мол «Кие», «Жақсылардың парызы», «Көз ілмейтін көңіл», «Сөнбейтін сезім», т.б. кітаптары басылып шыққан.
Энциклопедиялық жинақтың тұсаукесері Жамбыл ауданының сол кездегі білікті басшысы Жандарбек Далабаевтың қолдауымен аудандық мәдениет үйінде дүркіреп өтті. Республикамызға танымал қоғам қайраткерлері, ғалымдар, зиялы қауым өкілдері арнайы келіп, Күмісжан Байжанға жылы лебіз білдірді. Бұл кітап тәуелсіз ел тарихына қосылған құнды дүние екенін бірауыздан мойындап баға берді.
Бұрынғы ұжымы – «Егемен Қазақстан» газетінің қызметкерлерімен осы күнге дейін жақсы қарым-қатынаста. Жазушы-журналистің қарапайым болмысына, көпшілікпен ортақ тіл табысып, сыйласып, араласуына, кішіге құрметпен, үлкенге ізетпен қарауына қызығамын. Ол кісіні үлгі тұтамын. «Ұлық болсаң – кішік бол» деген ұлағатты сөз жаны жайсаң осындай жандарға арнап айтылғандай болады.
Қазақстанның Мәдениет қайраткері, Қазақстан Журналистер одағы сыйлығының екі мәрте иегері, танымал қаламгер Күмісжан Байжан бүгінде отбасында ардақты ана, аяулы жар, асыл әже. Жолдасы жоғары білімді заңгер, көп жыл ішкі істер саласында жауапты қызметтер атқарған Саламат Берекетов аға екеуі ұлдарын ұяға, қыздарын қияға қондырған. Асылдың тұяқтары еліміздің түкпір-түкпірінде, шетелде қызмет атқарып, тәуелсіз Қазақстанның өркендеуіне өлшеусіз үлес қосуда.
Әйел-ана бізге ардан аттамаған кіршіксіз тазалығымен үлгі-өнеге. Әр сөзіне ерекше мән беретін тазалығына да қызыға қараймыз. Бар ғұмырын таудың мөлдіріндей сақтап келеді. Әрдайым баршаға жанашырлық танытатын, жұдырықтай жүрегі мейірім деп соғатын әпкемдей адамдар өмірде көп болса ғой, шіркін! Өйткені жанашыр жан кімге де керек-ақ. Бүгінгі әйел қауымы мен қыздарға үлгі болатын ерекше қасиет екені анық.
Майра АЛДАБЕРГЕНОВА