Қазақстандық ғалымдардың коронавирусқа қарсы вакцина жасап шығаруына шамамен 3 жылдай уақыт кетуі мүмкін. Мұндай пікірді Денсаулық сақтау министрлігі дәрілік заттар мен медициналық бұйымдарды сараптаудың ұлттық орталығы директоры Арнұр Нұртаев айтты.
Оның айтуына қарағанда, қазір коронавирусқа қарсы вакцина әзірлеу үшін зерттеу басталып кетіпті. Медицина ұғымымен айтқанда, «үміткер-вакцина» таңдап алынған. Олардың саны – төртеу. Екі вакцинаны Ұлттық биотехнология орталығы әзірлеп жатса, тағы екеуін Биологиялық қауіпсіздік бойынша институттың биологиялық қауіпсіздік мәселелері орталығы даярлап жатыр. Әрі вакциналарды әзірлеу мерзімі 3 жылға дейін созылуы мүмкін. Сонымен қатар Арнұр Нұртаев жаһанда қазір 7 вакцина әзірленіп жатқанын айтты. Олардың 4-і қытайлық ғалымдардың, 3-і америкалық және еуропалық ғалымдардың даярлап жатқан вакциналары. Алайда дамыған елдерде әзірленіп жатқан вакциналардың өзі жарты жылсыз даяр бола қоюы екіталай. Тіпті, оларды шығару 1,5 жылға дейін созылуы мүмкін.
