Сыбайлас жемқорлыққа қарсы қызмет қазақстандықтар арасында арнайы сауалнама жүргізген еді. Сауалнамаға қатысушылар мемлекеттік органдарды көбіне жемқорлық қылмыстың қайнар көзі деп санайды.
Бұл 2019 жылы Қазақстанның сыбайлас жемқорлыққа қарсы саясатын іске асыру нәтижелері туралы баяндамада жария етілді. Сауалнамаға 14 облыс орталықтарынан, 136 ауданнан, сондай-ақ Нұр-Сұлтан, Алматы және Шымкент қаласынан 7,2 мыңға жуық қазақстандық қатысыпты. Олардың арасында 1,8 мың кәсіпкер де бар.
Қазақстандықтардың айтуынша, олар көбіне мемлекеттік ауруханалар мен емханаларда жемқорлыққа тап болады екен. Екінші орында полиция қызметкерлері тұр. Сондай-ақ қатысушылар жемқорлықтың 60 пайызы мемлекеттік органдарға тиесілі деп көрсеткен. Бұл тізімге Жер қатынастары басқармасы, мемлекеттік балабақшалар мен университеттер де кіреді.
Ал кәсіпкерлердің айтуынша, олар жер қатынастары бөлімінде жемқорлықпен жиі ұшырасады екен. Сауалнама бойынша жемқорлық жиі кездесетін мемлекеттік органдар тізіміне Мемлекеттік кірістер департаменті (салық), өртке қарсы қызмет, кеден органдары және Учаскелік полиция департаменттері енген.
Сауалнамаға қатысушылар кей сәттерде қағазбастылық салдарынан сыбайлас жемқорлыққа жол берілетінін мойындап отыр.
