Атырауда өткен республикалық «Жолда қабылдау» акциясы аясында атыраулық полицейлер 533 адамды қабылдады.
Ішкі істер министрі Е.Тұрғымбаевтың тапсырмасына сәйкес «Жолда қабылдау» акциясын республиканың барлық аймағында ай сайын өткізу қолға алынған.
Республикалық акция аясында атыраулық полицейлерге мәселесін айтып келген 533 адамның дені айыппұлдарды өтеу сұрақтарымен келген. Бұдан басқа тұрғындар тарапынан полицейлерге жол қозғалысын ұйымдастыру, автокөліктерді тіркеу, жүргізуші куәліктерін алу мен ауыстыруға, көші-қон қызметіне қатысты сұрақтар түсіп, жауаптары берілген.
Акция кезінде халықты қабылдау үшін қала орталығындағы «Байзар» сауда кешенінің алдына Атырау облысы Полиция департаментінің бастығы полиция полковнигі Қамза Үмбетқалиев барды.
Кезекті қабылдаудың ерекшелігі – халықпен байланыс интерактивті форматты қамтыды. Облыстың бас полицейі әлеуметтік желілердегі департаменттің ресми парақшаларының тікелей эфирі арқылы халықтың сұрағына онлайн режимде де жауап берді.
Тікелей эфирде тұрғындар күре жолдардағы апаттың, жол бойында төрт түлік малдың салдарынан болып жатқанына алаңдаушылық білдірді. «Жақында ғана автокөлік түйе малына соқтығысып, нәтижесінде бірнеше адам қаза болды. Жол бойындағы малға біреу бақылау жасай ала ма?» деді желі тұтынушысы департамент бастығына жолдаған сауалында.
– Бұл – қазіргі уақытта ел аумағындағы өзекті мәселе. Біріншіден, қараусыз жүрген мал – ұрылардың оңай олжасы. Екіншіден, жол-көлік оқиғаларының себепшісі. Біз бұл мәселені бірнеше рет мәселе етіп көтерген болатынбыз. ІІМ-нің бастамасымен қараусыз жүрген малға байланысты үшжақты келісімшарт жасалады. Келісімшарт жергілікті атқарушы орган, бақташы және мал иесі арасында жүзеге асып, қол қойылады. Аудандарда әкімшілік полицияның ұсынысы жүзеге асып жатыр. Мысалы, Мақат ауданында демеушілерді тарта отырып, мал шаруашылығы қожалығына 500-ден астам жарық шағылыстырғыш лента берілді. Лента ірі қара малдарға арналған. Әкімдікпен бірлесіп, бұл жобаны өзге аудандарда да жүзеге асыратын боламыз, – деп жауап берді Атырау облысы Полиция департаментінің бастығы Қамза Үмбетқалиев.
«Жолда қабылдау» акциясы барысында қару тапсыру жөнінде құқықтың кеңес алуға келген тұрғын Бахтияр Үмбеталиев мәселесін сол жерде шешті. Оған 1979 жылы шыққан «Зауэр» маркалы неміс мылтығы атасынан мұраға қалған. Қаруға аса қажеттілік жоқ болғандықтан, құжаттарын дайындауға мән бермей жүрген тұрғынға құқықтық кеңес беріліп, қаруды қабылдап алуға жауапты қызметкерлерге тапсырма берілді. Айтарлығы, жыл басынан бері Атырау полициясына тұрғындар 63 аңшылық мылтық пен 194 оқ-дәріні өз еріктерімен тапсырған. Ал заңсыз сақталған 10 қару тәркіленіп, ӘҚБтК-тің 484-бабына сәйкес жинақталған іс-құжаттар сотқа жолданған.
«Жолда қабылдау» акциясының бұл жолғы ерекшелігі қаланың негізгі ықшамаудандарымен қатар 12 тұрғын үй ауласында қабылдау жүргізілді. Департамент бастығынан өзге оның орынбасарлары Сұлтан Молдашев пен Нығмет Мутигуллин да халықтың ортасына барып, өтініштерін тыңдады. Вокзал алдындағы қабылдау акциясында азаматтардың шетелдік көліктерді тіркеу жөніндегі өтініштерін тыңдап, заң тұрғысынан кеңес берген полиция полковнигі Нығмет Мутигуллин: «Полиция департаменті халықпен оңтайлы байланыс орнату жұмысына баса назар аударып келеді. Бұған дейін азаматтарды жеке сұрақтары бойынша Департамент жанынан ашылған фронт-офисте, Nur Otan партиясының қоғамдық қабылдау бөлмесінде қабылдап келдік. Енді акцияны пайдаланып, халықтың ортасына өзіміз келдік. Акция халық көп шоғырланған аймақтарда өтіп жатыр. Бұл тұрғындардың қордаланған мәселелерін шешуге ықпал етеді» деді.
Өтініш білдірушілер қатарында «Нұрсая» ықшамауданындағы №14 үй тұғыны Әсия Әбдықалықова қабылдауға ерте келді. Ол өзі тұратын ықшамаудандағы барлық үйден жырақ салынған қос жатақхана тектес 9 қабатты үйдің ауласынан учаскелік полиция пунктін көшіруге қарсы.
– Өтініш жасап, тәртіп сақшыларының санын ұлғайттық. Бұрын ұсақ ұрлық көп болатын, сап тыйылды. Көпқабатты екі үй интернат тәрбиеленушілеріне берілген, кіл жастар. Бұрын түндегі тыныштық бұзылды деп жиі шағымданатынбыз, аулаға полицейлер келгелі күні-түні жұмыс істеп жүр. Телефон соқсаң арызыңды өздері келіп алып кетеді. Полицейлерге ризамыз. Жақында біздің ықшамауданда жаңа полиция пункті салынды, ауладағы учаскелік пункт сол жаққа көшіріледі екен дегенді естігесін келдім. Әрине, полицейлер де кең ғимаратта отырғанды қалайтын шығар. Бірақ біздің учаскелік инспекторлар ауламызға керек, осыны ескерерсіздер, – деді тұрғын.
Сайып келгенде, полицейлердің тұрғындармен арасының жақын болып, өзара түсіністікпен мәселе шешуге ықпал ететін «Жолда қабылдау» акциясы көптеген жайттың күрделене түсуіне жол бермейді. Бұл халық үшін де, халықтың қауіпсіздігін қамтамасыз ету жауапкершілігі жүктелген полицейлер үшін де маңызды.
Атырау облысы