Апта басында Солтүстік Корея Вонсан портына жақын жердегі Кальма аймағынан қысқа қашықтықтағы екі зымыран ұшырды. 30 шақырым биіктікте 250 шақырым қашықтыққа ұшқан зымырандар Жапон теңізіне барып құлаған. Оңтүстік Кореяның қорғаныс министрі Чжон Кен Ду бұл жолғы зымырандардың осыған дейін сыналған қару үлгілерінен ерекшеленетінін айтты.
Өткен жылы АҚШ президенті Дональд Трамппен кездескен Солтүстік Корея басшысы Ким Чен Ын диалогқа дайын екенін білдіріп, ядролық қару сынақтарын доғаруға келіскен. Өз кезегінде ресми Пхеньян АҚШ пен Оңтүстік Кореяға бірлескен әскери жаттығуларын өткізбеу талабын қойған. Соңғы уақытта Корей түбегіндегі әскери жаттығулар саны қысқарғанымен, АҚШ пен Оңтүстік Кореяның бірлескен қимылдары тоқтаған жоқ. Кезекті әскери жаттығу тамыз айына жоспарланған. Солтүстік Корея өз шекарасына жақын маңдағы әскери қимылдарды «соғысқа дайындық барысы» деп қабылдап, өзіне қарсы ұйымдастырылған қауіп көреді. Сондықтан Солтүстік Корея билігі сейсенбі күні таңға жуық ұшырылған зымыранды көршісіне жасалған «салтанатты ескерту» деп атады. Вашингтондық сарапшы Харри Казианистің пікірінше, зымыран сынағы «сендер әскери жаттығуларыңды доғармасаңдар, біз әскери қуатымызды көрсетуді жалғастыра береміз» дегенді білдіреді.
Бейсенбі күні Ұлыбритания, Франция және Германия Солтүстік Кореяны АҚШ-пен келіссөзге келуге шақырды. БҰҰ Қауіпсіздік кеңесінде жабық есік артында өткен талқылаудан кейін «Пхеньян ядролық қару бағдарламасынан бас тартпайынша, Солтүстік Кореяға салынған халықаралық санкциялар өз күшінде қалуы керек» деген мәлімдеме жасалды.
Маусым айында Дональд Трамп пен Ким Чен Ын демилитаризациялық зонада кездесіп, ядролық қарудан бас тарту бойынша келіссөздерді қайта жандандыруға келіскен. Ресми Пхеньян «әскери жаттығулар аталған келіссөз барысына әсер етуі мүмкін» деп ескерткен. АҚШ-тың Мемлекеттік хатшысы Майк Пампео алдағы уақытқа Дональд Трамп пен Ким Чен Ынның кездесуі жоспарланбағанын, бірақ тараптар арасындағы диалог тезірек басталарына үміт артатынын жеткізді. ВВС өткен айда жер серігінен түсірілген суреттен Солтүстік Корея территориясынан «радиоактивті заттардан ядролық отын жасау процесі» деп шамалауға болатын жұмыстар байқалғанын жазған. Ал кеше таңертең Солтүстік Корея осы аптадағы үшінші зымыранын ұшырғаны белгілі болды.