«Біз қазір карантинді жеңілдету бойынша арнайы жоспар дайындап жатырмыз. Жуық арада қалың көпшілікті осы жоспармен де таныстырамыз. Біз халықаралық тәжірибені зерттеп жатырмыз, көптеген сарапшыны тарттық. Әлем елдері карантинннен қалай шықты және қандай шаралар қолданды. Карантинннің бірден алынып тасталмайтыны түсінікті ғой», – деді министр.
Оның айтуынша, карантинді жеңілдету шаралары сатылап жүзеге асырылады. "Қазақпараттың" жазуынша, елдегі эпидемиологиялық жағдайды зерттейді.
«Мүмкін денсаулық сақтау саласы бойынша, қандай да бір өктемдік жүргізіп, демалыс күндері локдаун жариялармыз. Арақашықтықты сақтап, жұмыс орнында шектеу шараларының көптеген тәсілі бар. Жалпы, қазіргі таңда әлемде вирусты тежеудің сан түрлі тәсілдері сынақтан өтіп жатыр», – деді Алексей Цой.
Министр «балабақша мен білім беру орындары қайта ашыла ма?» деген мәселеге қатысты сауалға жауап берді.
«Ол үшін бізге 2 тамызда жағдайдың қандай болатынын білу керек. Егер ол уақытта жағдай тұрақтанып, көрсеткіштер қазіргідей жақсарса, біз балабақшалар мен білім беру мекемелерін ашу мәселесін пысықтайтын боламыз. Ал керісінше, вирус қайта өршіп, болмаса ауру мен одан қайтыс болғандар саны өсетін болса, әрине, біз үкіметке карантинді соза түсуді ұсынамыз», – деді министр.
Дөңгелек үстелде министр еліміздегі эпидемиологиялық жағдайдың тұрақталып келе жатқанын айтты.
«Қазір жағдай түзеліп келеді. Біз екі аптаға созылатын карантин шарасының нәтижесін тек 3-4 апталарда ғана біле аламыз. Өйткені инкубациялық кезең 14 күн. Осы 14 күн өткеннен кейін ғана біз карантиннің нәтижелерін көре аламыз. Тамыздың ортасына қарай ахуалды сараптап, қараймыз», – деді Алексей Цой.