Алайда кезінде шахтерлар қаласы болған аудан орталығы Ленгер қаласы көп жыл бойы елеусіз, ескерусіз қалып кеткен-ді. Бос тұрған көпқабатты үйлер, қараусыз қалған зауыттар көзге оғаш көрініп тұратын. Қаладағы мүлгіген тыныштықтың өн бойына соңғы 4-5 жылда ғана қан жүгірді. Біртіндеп құрылыс жүре бастаған. Ал енді қазір ауданда, тіпті құрылыс қарқынды. Көпқабатты үйлер салынып, аллеялар мен демалыс аймақтарының саны да көбейді. Былтырдан бері қалаға балалар ойын алаңшаларының түр-түрі орнатылып жатыр.
Елімізде болып жатқан пандемия жағдайына қарамастан, ауданда құрылыс бір күн де тоқтаған жоқ. Әсіресе, биыл Түркістан облысының біраз аймағы су тасқынынан зардап шеккенін білеміз. Оның ішінде Төлеби ауданы да бар. Алайда аудан басшылығының жедел іс-әрекеті аясында сол күні үйлерін су басып қалған адамдар тез арада қауіпсіз жерге көшірілді. Жалпы, 78 азамат эвакуацияланып, 40 шақты тұрғын ағайын-туыстарының үйіне жайғасқан болатын. «13 мамыр күні болған нөсер жаңбыр біздің ауданға да біраз шығын келтірді. Бірқатар көпірді су шайып, көптеген үйді басып қалды. Ертесіне оқиға орнына облыс әкімі Өмірзақ Естайұлының өзі келіп, тұрғындарға басу айтып, олар үшін барлық жағдай жасалатынын жеткізді. Арнайы құрылған комиссияның шешімімен 42 үй жарамсыз деп танылып, оларға жаңа үй салынып берілетін болды. Республикалық төтенше жағдай қорынан осынау үйлердің құрылысы үшін 488 млн теңге бөлінді. Олардың барлығы да 100-80-60-50 шаршы метр болатын 4 түрлі үлгімен сел болмастан бұрынғы үйлерінің көлеміне қарай салынып жатыр. Ал қауіпті аумақта орналасқан деп танылған 9 үйдің орнын ауыстырып салып беріп жатырмыз. Ленгер қаласындағы жаңа ықшамауданнан әрқайсысына 10 сотықтан жер бөліп, бүгінде бірдей үлгіде тұрғызылып жатқан үйлердің құрылысы біткелі тұр», – дейді аудан әкімі Бауыржан Омарбеков.
Бұдан бөлек, аулаларын су шайған, үйлеріне ағымдағы жөндеу жұмыстары керек үйлер түгелдей дерлік сол кезде-ақ реттеліп беріліпті. Оған облыстың 3 ауданы техника жіберді. Аудан кәсіпкерлері де үлес қосты. Ал су шайып кеткен 4 көпір де қайта қалпына келтірілді. Сел салдарынан зардап шеккен Ленгер қаласының орталығын кесіп өтетін Ленгерка өзенінің айналасы да абаттандырылып жатыр екен. Аудан басшысының айтуынша, өзен кеңейіп, тегістеліп жатыр. Мұнда жолаяқ, автотұрақ, орындықтар орналастырылып, өзен жиегі бекітілмек.
Төлеби ауданында бүгінде 6 мектепте құрылыс жүріп жатыр. Оның 3-еуі жаңа құрылыс болса, 3-еуі қосымша болып саналады. Көксәйек елді мекенінде аудан бюджеті есебінен 100 балаға арналған бастауыш мектеп бой көтеруде. Ал облыс бюджеті есебінен Қайнар және Ақбастау ауылындағы 200 орындық мектептердің құрылысы жүріп жатыр. Сондай-ақ Ленгер қаласындағы №2 Ш.Уәлиханов атындағы 1965 жылы салынған білім ордасына күрделі жөндеу жұмыстары жүріп, бүгінде пайдалануға берілуде.
Сондай-ақ ұлы кемеңгер Абай Құнанбаевтың 175 жылдығына орай Абай аллеясын салуды қолға алыпты. Құрылысшылардың жұмысы қарқынды. Мұнда ұлы тұлғаның ескерткіші де қойылмақ.
Шалғай ауылдарға аяқжолдар да салынып жатыр. Сонымен қатар, ауданның Біркөлік шатқалына барар жолындағы биік қырға «Табиғатты тамашалу алаңшасын» орнатыпты. Мұнда келушілердің естелікке суреткетүсіп, бәр сәт демалуына жағдай жасалған.
Биыл елді мекендерді сапалы электр қуатымен қамту жобасы аясында республикалық бюджеттен қаралған қаржыға 6 жоба іске асып жатыр. Жоба аясында 21 елді мекендегі 49 көшенің электр бағаналары, трансформаторлары жаңаланбақ. «Яғни 4 421бағана ауысып, 110 шақырым жаңа желі орнатылып, 48 трансформатор қойылатын болады. Осы атқарылған жұмыстардың нәтижесінде аудан бойынша 1 500 шақырым электр желілері болады. Осылайша, ауданда әлі тозығы жеткен электр бағаналарын тұтынып отырғандардың саны 9,7 пайызға дейін төмендейтін болады. Қалғаны кезең-кезеңмен 2022 жылға дейін барлық тұтынушы толық сапалы электр қуатымен қамтылмақ», – дейді аудан әкімі.
Назгүл НАЗАРБЕК
