«Мереке алдында шарапатты шараның бастамашысы болғанымызға қуаныштымын. Егер біз ынтымағымыз бен бірлігімізді көрсете білсек, елде жағдайы нашар, қиналған отбасы болмайтынына сенемін. Мұндай мейірімділік қадамы алдағы кезде де жалғасады» деген қор ұйымдастырушысы үйдің кілтін көпбалалы ана Самал Нұрпейісоваға тапсырды.Жалғызбасты ана өзінің 5 баласымен бірге бірнеше жыл пәтер жалдап тұрғанын, енді олардың өз баспаналары болатынын айтып, қуаныштан көз жасына ерік берді. Алыстағы Алакөлде Құрбан айт күндері «Мың алғыс» республикалық акциясы аясында, «Бейсенбаев» ШҚ атынан 1 ірі қара мен «Алимбеков», «Бутунчинов» және «Шынқожаев» шаруа қожалықтары атынан 4 қой құрбандыққа шалынып, ауданның ірі ауылдық округтерінің бірі Бескөлдегі тұрмысы төмен, мұқтаж 50 отбасыға таратылған. Сондай-ақ ауданның тұрақты демеушілері Бауыржан Оспанов төрт, Елжан Әбдрахманов бір ірі қараны құрбандыққа шалып, тұрмысы төмен отбасыларға таратса, Б.Сиырбаев, Ж.Абдрахманов және М.Беков сынды кәсіпкерлер 3 ірі қараның етін қауіпті індетпен күресіп жүрген медицина қызметкерлеріне жеткізіп беріп, қолдау көрсетті. Жалпы, Алакөл ауданы бойынша демеушілер, кәсіпкерлер мен қайырымды азаматтар тарапынан барлығы 17 ірі қара, 530 ұсақ мал құрбандыққа шалынып, 1 000-нан аса отбасыға таратылды.
Болат АБАҒАН, Алматы облысы